ÎZMÎR - Karkera ramitişî ya mewsîmî Gulcîhan Kaya semedê dermankerdişê tutê xo Yusuf ke nêweşê SMAyî yo, wazena ke dermano lazim bêro Tirkîya.

 

Maya tutê bi nameyê Yusuf Kaya ke 12 aşme yo û nêweşê SMA Tîp-1 (Spînal Muskuler Atrofî) yo, Gulcîhan Kaya karkerê ramitişî ya û rojane bi 50 TL xebityena. Gulcîhane dîyar kerd ke dermanê bi nameyê Zolgensman ke semedê dermankerdişê tutan lazim o 2 hezar û 400 dolarî yo, la zaf kêm kom kerdê û vat, ganî derman bîyarê Tirkîya. Gulcîhane semedê dermankerdişê tutê xo pabeyê paştdayîşî ya.

 

Dermankerdişê nêweşîya genetîkî ya rayîr ver bi helnayîşê kasan akeno û tesîrê serê hucreyê sînîr yê motor ke omurîlîkî de yo keno, dermankerdişê ci Tirkîya nîno girewtene. Dermanê bi nameyê spînraza ke dermankerdiş de yeno xebitnayene zî nêweşî peyser keno. Keyeyê ke tutê înan SMAyî bi serran o semedê dermanê bi nameyê Zolgensma yê Almanya, Katar û Macarîstanî de yeno xebitnayene, Tirkîye tesdîq bikero û semedê bêro tesdîqkerdene serê çapemenîya dîjîtal de hewl danê vengê xo bidê eşnawitiş.

 

'Her aşme tutî mirenê'

 

Gulcîhane dîyar kerd ke lajê ci 2 aşme bîyo, nêweşîya ci ameya tespîtkerdene, ewil şîyê Enqere û dima ra şîyê Îzmîr û vat: "Ma şî nêweşxane û ma uca de tedawîye ci dest pêkerd. Nika 12 aşme yo. 10 aşmî nêweşxane de derbas kerd. 4 aşme de qirike ci qelişnayî. Bi xortum ma wey kerd."

 

Gulcîhane dîyar kerd dermankerdişê nêweşîye Tirkîya de çin o, dermankerdiş zaf vay o û vat: "tutê mi heta di serre tewr zêde ganî 13 kîlo bigiro. Yan zî bedenê ci dermankerdiş rê cewab nêdano. Dermankerdiş bi pereyê tirkî 2 trîlyon keno. Ma nêeşkenê vengê tutê xo bidê eşnawitiş. Ma nêeşkenê tutê xo dir eleqeder bê. Wa veng bidê vengê ma. Wa hetkarî bikerê. Her rey m aşinê vanê, esteyê ci helênê. Her aşme tutî semedê na nêweşî mirenê. Çîyêk zaf zehmet o."

 

'Dewlete destûr nêdana kampanya' 

 

Gulcîhane tewr peyîn vat ke bi karkerîyê mewsîmî debara xo kenê û vat: "Ma senîn biewnê tutê xo ra. Semedê dermankerdişî aşme ra 5 hezarî şino. Ma zî roje de 50 lîra qezenc kenê. Nika nêweşxane de semedê ke ewnîyenê înan ra şit danê. Ma ten apeçete gênê. La ma bîyarê keye ganî ma her çî bigîrê. Hîrê tutê mi bînî zî estê. 5 hezar û 400 hezar dolar bi pereyê Tirkîya 2 trîlyonî ra zêde keno. Dewlete destûr nêdana kampanya. Semedê dewlete derman tesdîq nêkerda. Ma wazenê nê qedexeyî wedarno û derman bîyarê Tirkîya."

 

Gulcîhane dîyar kerd ke kesê wazenê hetkarî bikerê, eşkenê serê numaraya xo biresnê: 0555 176 15 30