ENQERE - HDP bi minasebetê Roşanê Ziwanê Kurdkî eşkerayîyêke da û vat: "Wayîrvejîyayîşê ziwanê kurdkî wezîfeyê ma yê sereyîn û bingeyê têkoşînê ma yê polîtîk o. Heta ke ziwanê ma azad nêbo, ne şexsê ma, ne fehmê ma û ne zî bîyayîşê ma azad o."

 

Bi minasebetê 15ê Gulane Roja Roşanê Ziwanê Kurdkî, hemvervatoxê Komîsyonê Taqîbkerdişê Xerîtaya Raya ya Kurdkî ya Partîya Demokratîke ya Şaran (HDP) Dêrsim Dag û Salîm Kaplan eşkerayîyêke nuşteyî dayî. Eşkerayî de roşanê ziwanî ame pîrozkerdene.

 

Eşkerayî de wina ame vatene:

 

15ê Gulana 1932yî tarîxê roşnvîrî, kulturî û ziwanî yê kurdkî de rojêka taybet a. 89 serrî verê ney Şamî de bi ked û emegê Celadet Alî Bedirxan û embaz û dostê ey a kovara Haware bi herfê latînkî dest bi xebatanê xo kerd.

 

Kovara Haware sey mektebêk bî...

 

Kovara Haware ziwan, kultur û nasnameyî ra bigî heta zaf warê roşnvîrîye de şorişêko pîl viraşt. Kovara Haware seba kurdan bî wendegehêk û hîna zî rayîrê cîgêrayoxan, mamostayan û heme heskerdoxanê kurdî akena.  Sey Mîr Celadet Alî Bedirxanî zî vato Hawar vengê zanayîşî yo, zanayîş xonaskerdiş o. Xonaskerdiş zî seba ma rayîrê felatî û weşîye akeno.

 

Ziwan bingeyê têkoşînê ma yê polîtîk o

 

Kovara Haware warêko hera seba xebatanê kurdkî awan kerd û coka serra 2006an de roja awanbîyayîşê Kovare yanê 15ê Gulanê sey Roşanê Ziwanê Kurdkî ameya qebul kerdene û 2006an ra  nover 15ê Gulanê sey Roşanê Ziwanê Kurdkî yena pîroz û bimbarekkerdiş.

 

Ewro 15ê Gulane yo, Roşanê Ziwanê ma Kurdkî yo. Roşanê ma xoverrodayîşê ma yo, têkoşînê ma yê seba ziwanî yo. Seba ke ma verê asîmîlasyonî bigîrê, seba ke her ca û her warî de ma bi azadîye bi ziwanê xo qisey bikerê, seba ma perwerdeyê xo bi ziwanê xo bigîrê, seba heq û edaletê ziwanê ma, seba heqê bi mîlyonan kurdan; ma ewro roşanê xo bi têkoşînê xo ya pîroz û bimbarek kenê.

 

Ma bi wesîlaya na roje, Feqiyê Teyran, Ehmedê Xanî, Ehmedê Xasî, Usman Efendîyo Babijî, Celadet Alî Bedirxanî, Nuredîn Zazayî, Rêncber Ezîzî û heme xoverrodayoxanê ziwanê kurdkî anê xo vîrî û înan yad kenê. Heta azadîya xo û ziwanê bigîrê xo dest ma do têkoşînê xo bidomnê.

 

Roşanê Ziwanê Kurdkî pîroz bo

 

Asîmîlasyono ke ziwanê ma ser o çerxa xo geyrneno do pûç bibo. Ziwanê ma do biciwîyo. Hezaran serre ma ziwanê xo nêda, hezarna serre zî ma do wayîrê ziwanê xo bê û ma karkerîya ziwanê xo bikerê.

 

Serrgêra 89in de ma bi rêz û hurmet û minet Celadet Alî Bedirxanî û embazanê ey yad kenê. 15ê Gulanê Roşanê Ziwanê Kurdkî heme şarê ma rê û heskerdoxanê kurdkî rê pîroz û bimbarek bo.