Medya Uren

 

MÊRDÎN - Karkerê ramitişî derheqê problemê ke ciwîyenê û krîzê ekonomî ser o vatî ke feydeyê dewlete semedê înan çin o û vatî: "Dewlete tu paştdayîş nêdana karkeran. Dewlemendan tewr dewlemend kena û feqîran tewr feqîr kena. Awa çemê ma ya dewe, roşena ma. Madem feydeyê dewlete semedê ma çin o, wa zirar zî nêdo ma."

 

Her ke krîzê ekonomî kûr beno, karkerî tewr zêde kewenê tengî û feqîr benê. Serrê peyînan de bi pandemî dir no krîz tewr pîl bi, îqtidar semedê hetê polîtîkayê ekonomî de kêmîyê xo binimno, her rayîrî ceribneno. Karkerê ramitişî Fatma Ozdemîr û Medîne Aga derheqê problemê ke ciwîyenê de qisey kerdî û vatî, dewlete tena paştdayîş dana dewlemendan û her ke şino ê tewr feqîr benê. Fatma dîyar kerd ke awa ke ê çem ra ancenê serê erdê xo zî do êdî bi pere bigirî û vat do binê deynî de bimanê.

 

'Tewr zêde cinî zehmetî vînena'

 

Fatma Ozdemîr dewa 7 Xuşkayî ya girêdayê Xursê Qoserî ya. Aye bi keyeyê xo dir serê 10 domin erdî de karê ramitişê tûtinî kena. Ê 11 mengê xo serê erdî de derbas kenê. Ramitiş, arêdayîş, amadekerdiş û rotişê înan kenê. Erdê ke ser de xebityenê zî bi kîra gênê û bi wayîrê erdî dir pereyê ke qezenc kenê, nîme nîme pare kenê. Ramitiş na menge de dest pêkeno û semedo ke ma rewşa xebata înan pers bikerê ma înan dir kewtî têkilî. 

 

Fatma ma rê wina qal kerd: "Ma 11 mengî tîya de yê. Zehmetîyê ke ma ciwîyenê, nînê qalkerdene. Mîyanê herre de verê tîjî de ma roje bî zî ma xebityayîne. Ma şinê keye reyan ma xo ra nêvînenê ke destê xo bileqnê. Bi taybetî zî cinî zehmetî ancenê. Yo tewr xirab zî no kar tu feyde nêdano ma."

 

'Ma dewlete ra zirar vînenê'

 

Fatma bale ant serê problemê ekonomî û wina dewam kerd: "Xora ameyîşêk nêkeweno destê ma. Ma karker ê yê feqîrî ma yê. Lazimîyê ma bi paştdayîş esto. La heta nika ma paştdayîşêk nêdîyo. Ma dewlete ra zirar vînenê. Dewa ma kerdê taxe. No zî semedê feydeyê xo wina kerdê. Do wina tewr zêde bacî ma ra bigîrê."

 

'Ma karkeran mexdûr mekerê'

 

Medîne Aga zî dîyar kerd ke ê destek nêvînenê û vat: "Karê ma karê feqîran o. Kes paştdayîş nêdano ma. Ma çîyêk zî nêhesibnenê. Her tim ê ke dewlemend benê û paştdayîş vînenê dewlemend ê. Yê feqîrî zî tim ma yê. Ma mecbûr tîya de yê. Ez her roj Qoser ra yena na dewe de xebityena. Ma zî 6 donim erd girewto. Ma ramitişê tûtinî, balîcanan, îsot û firingîyan kenê. Ma nê dir nêeşkenê rojê xo zî derbas bikerê. Berardişê ma serê ma de manenê, ancax ma mesref bikerê. Nê ser de ma wayîrê erdî dir pereyê xo kenê nîme. Ganî paştdayîş bidê keda ma. Ganî ma karkeran bes mexdûr bikerê."