RIHA - Heyetê ke parlamenter û Vervatoxa HDPyî Ebrû Gunay zî mîyan de ca girewte, bi minasebetê Roşanê Remezanî serdayîşê keyeyê Rayberê PKKyî Abdullah Ocalan kerdî.

 

Heyetêk Partîya Demokratîke ya Şaran (HDP), bi minasebetê Roşanê Remezanî serdayîşê keyeyê Rayberê PKKyî Abdullah Ocalan ke 22 serrî yo Zîndanê Îmraliyî de binê tecrîdêk girankerde yo, kerdî. Vervatoxa HDPyî Ebrû Gunay, Parlamentera Rihayî Ayşe Surucu, Parlamenterê Dîlokî Mahmût Togrûl û endamê partîye heyetî de ca girewtî. Heyetî, wayê û birayê Abdullah Ocalan, Fatma Ocalan û Mehmet Ocalan yê dewa Amara ya girêdayê qezaya Xelfetî ya Rihayî de ciwîyenê, zîyaret kerd.

 

Heyetî vernê de birayê Abdullah Ocalan, Mehmet Ocalanî zîyaret kerd. Mehmet Ocalan bale ant serê pvînayîşo tewr peyînî û vat: "Rayberê PKKyî Ocalan pêvînayîş de vat, ‘Dewlete kay kena, şima zî... No huqûqî nîyo û rast nîyo. Ez  wazena avûkatê mi bêrê û pêvînayîş mi dir bikerê.' Rewşa bîyaye ne exlaqî, ne sîyasî û ne zî wijdanî yo. Ganî kayê dewlete nêrê qebulkerdene. Selahîyetdarê zîndanî bi îradeyê xo tênêgeyrenê."

 

Heyetî dimayê serdayîşê waya Abdullah Ocalan, Fatma Ocalane kerd û roşanê aye pîroz kerd.