MÊRDÎN - Filiz Bozan Irmak ke mêrdeyê ci Ednan Irmak zîndan de yo û 5 tutê înan estê, bale antî serê binpaykerdişê heqê zîndanan û  rewşa xo ya zehmet a ekonomî û wina vat: "Semedê mêrdeyê mi bi neheqî zîndan de yo ma rojê zehmet wareyê ekonomî de ciwîyenê. Sewbîna zîndanan de tecrîd û binpaykerdişê heqan esto. Coka semedê şikinayîşê zîncîrê tecrîdî ganî ma pîya têkoşîn bikerê."

 

Zîndananê Tirkîya de bi hezaran tepişteyê sîyasî û bi seyan tutî estê. Nê tepişteyî bi hawayêke bê huqûq yenê tepiştene û yenê tecrîdkerdene. Hemverê tecrîd û binpaykerdişê heqê tepişteyan xeylêk rey dest bi çalakîya grevê vêşanîye kerdê. Tewr peyîn  27ê teşrîna peyêne 2020î de tepişteyan grevê vêşanîye yê bêdem û bidor dabî destpêkerdene. Çalakîya grevê vêşanîye ya tepişteyê sîyasîyan dewam kena.

 

Bêheqî û tecrîdê zîndanan dewam keno û tesîrêk pîl serê keyeyê tepişteyan de keno. Nînan ra yew zî Filiz Bozan Irmak û Ednan Irmak o. Filiz û Ednan dadî û pîyê 5 tutan ê. Bi rayîrê tecrîdî tesîrêk negatîf serê nê tutan de yeno kerdene.

 

Keye sere de problemê ekonomî ciwîyenê

 

Ednan Irmak şaredarîya Mêrdînî ke HDP qezenç kerdib de xebityeno. Dimayê ke qeyûm yeno tayînkerdene, o zî yeno îxrackerdene û qerarê tepiştişê ci yeno dayene. Coka Ednan 3 serrî bi hawayêke qeçax cuya xo derbas kerd. No sebeb ra keye ci problemê pîlî yê ekonomî cuyayî. Ednan vernîya 2 serrî, 5 serrî ceza ci rê ameye birnayene. Dimayê ke kewt zîndan zî rewşa înan tewr zehmet bena.

 

'Tutî hetê psîkolojî de bi tesîr bî'

 

Cinîya Ednanî,  Filîze dîyar kerd ke tutê ci tedayî ra tesîr bîyê û vat: "Mêrdeyê mi endamê partîyêke legal a ke Tirkîya de partîya 3ine ya yo. Semedê endamê na partî zafreng û  demokrat bî, xebatê înan ameyî îlegalîzekerdene û tepiştiş înan rê heq yeno vînayene. Oyo ke zorê ma zî şin o no yo. Bi hawayêke bêhuquq û keyfî ma bêrê tepiştene, no heq nîyo. Semedê nê zî Ednan nêwaştêne bêro tepiştene. La no zî tepiştiş rê tewr xirab bi. Cu ma hemine rê nêmend. Tutî, bi taybetî hetê psîkolojî de bi tesîr bî. Ez bi xemgînbîyayîşî înan dir tewr bêhêz bîne."

 

'Ma huzûr nêdî'

 

Filîze bale ant serê problemê ekonomî û vat: "Hêdî hêdî problemê ekonomî xo dayî teber. Problemê mi û Ednanî yê weşîye estbî. Problemê kronîk bî û nika zî nê dewam kenê. Bifikrîyê çend tutî bendeyê şima yê la pîyê înan yeno tepiştene û her di zî problemê weşîye ciwîyenê. No semedê tutan rewşêke zaf zehmet o. Temînatêk ma yê ekonomî zî çin o. Her roja ma bi endîşe derbas bi. Keyeyê ma kîra bi, pereyê ceyranî, awe, mesrefê rojane, wendişê tutan, mesrefê zîndanî û sewbîna lazimîyê ma virazyayîne. Coka zî a roje heta na roje ma deyndar ê."

 

'Semedê şikinayîşê zîncîrê tecrîdî ganî ma pîya têkoşîn bikerê'

 

Filîze tewr peyîn wina vat: "Rewşa tepişteyan baş nîya. Semedo ke ma pêro tecrîd de yê. No nêzdîbîyayîşê hemverê înan bêhuqûqî yo. Coka tesîrêk pîl zî ma keyeyan rê kenê. Bi nê rengî tena bi hezaran tepişteyan înan dir bi milyonan kurdan bi tesîr kenê. Ganî ma aya bibê û nê ferqî de bê. Semedo ke ma zîncîrê tecrîdî bişiknê zî ganî ma pîya têkoşîn bikerê. Ma paştdayîş bidê çalakîya înan ê grevê vêşanîye."