Sema Çaglak

 

AMED - Parlamentera HDPyî Remzîye Tosun hêrişê hemverê keyeyê Hewlêrî şermezar kerd û vat: "Hêrişê hemverê bîyayîşê kurdan ame kerdene û hemverê kurdan şerêk ameyo destpêkerdene. Hemverê nê ganî yewîya kurdan aver şêra."

 

Bi taybetî serrê peyînan de hemverê kurdan de hêrişê nîjadî tewr zêde bî. Tewr peyîn 14ê gulane de komêk nîjadperestan bi cop û kerreyan hêriş keyeyêk kurdî ke semedê betlaneyî Hewlêr ra ameyî Mersîn kerdî. Hêriş hetê 3 kesan ra herema Gozsuzce Sirtlanî yê girêdayê qezaya Bozyaziyî de ame meydan, keye ra yew ci ra giran 2 kesî birîndar bî. Ame dîyarkerdene ke derheqê serebûtî de cipersayîş ameyo destpêkerdene. Derheqê babete de parlamentera Partîya Demokratîk ya Şaran (HDP) a Amedî Remzîye Tosun ajansê ma rê qisey kerd.

 

'Hêriş hemverê bîyayîşê kurdan o'

 

Remzîye, dîyar kerd hêriş hemverê ziwan û kurdbîyayîşî yo û vat: "Bi taybetî serrê peyînan de hetê Tirkîya ra hêrişê nîjadperestî yê hemverê kurdan zêde benê. Şîdetê serê ziwan, cinîyan û hêrişê hemverê bîyayîşê kurdan êdî xo resnayo sewîyeyêka tewr berz. Keyeyêk  Mersînî rastê hêrişî amebi û no çîyêk newe nîyo. Tirkîya de nimûneyê winasî zaf estê. Enqere de paytextê Tirkîya de ciwanêk kurd semedê ke kilamê kurdî goşdarî kerd, ame qetilkerdene. Sakarya de zî reyna kurdî bi hêrişê nîjadperestî dir rî bi rî mendibî."

 

'Hemverê kurda şerêk yeno kerdene'

 

Remzîye dewam de wina vat: "Her wareyî de qirkerdişê kulturî, tarîxî û nasnameyî yeno kerdene. Bi hawayêke zelal hêrişêk zêde serê kurdan de yeno kerdene. Ma zî sey şarê Kurdî bi serran o xo ver danê. Ma hemverê îqtîdarî, faşîzmî û nîjadperestî de têkoşînê xo tewr pîl bikerê."

 

'Semedê yewîye ziwanê dayîke girîng o'

 

Remzîye qalkerdişê xo wina dewam kerd: "Her cayêk de şerêk taybet dewam keno. Bi taybetî serê ziwanê ma de hêriş yeno kerdene. Her wareyî de vera nê şîdet û îstîsmarêk esto. Wazenê ziwan werte ra wedarnê la kampanayayêke xurt ameye dest pêkerdene û cewabêk tewr xurt na kampanya de ame ramojnayene. La na kampanya qîm nêkena. Ganî her wareyê cuye de tutî û pîlî bi ziwanê xo qisey bikerê û perwerde bivînê. Babeta ziwanî de yewîya kurdan rolêk pîl gêna. Ma çiqas wayîr vejîyê, ma hende eşkenê xo bipawê. Rayberîya nê zî tewr zêde cinî eşkenê bikerê."

 

'Wayîr vejîyayîşê ziwanî lazim o'

 

Remzîye tewr peyîn qiseykerdişê xo de dîyar kerd ke ganî her keyeyî de ziwan û pawitişê kulturî bibo mektebêk û vat: "Hêrişê nîjadperestî ke tewr zêde serê ziwanî de yeno kerdene, ancax bi pawitiş û wayîrvejîyayîşêk pîl eşkeno bêro kerdene. Herkeyeyî de ganî tutî bi ziwanê xo pîl bibê û her wareyê cuye de bi ca bibo."