RIHA - Emîne û lajê xo Ferît Şenyaşar ke vizêr nobeta xo ya edaletî de bi kuyayîş amebî destbendkerdene, ewro ameyî verê Edlîyeyê Rihayî û nobeta xo ya edaletî dewam kenê. Emîne qisey kerd û vat: "Dewlete çin a, edalet çin o la zulm esto."

 

Emîne Şenyaşar ke mêrde û 2 lajê ci netîceyê hêrişê merdim û pawitoxê Parlamenterî AKPyî Îbrahîm Halîl Yildiz de dinyaya xo bedilnayî û lajê ci Ferît Şenyaşar zî serebûtî de birîndar bi, dest bi nobeta “edaletî” kerdî.  Çalakîya Emîne û Ferîtî roja 74ine de dewam kena.

 

'Dewlete çin a, edalet çin o'

 

Emîne wexto ke vizêr amebî destbendkerdene, ard vîr ke polîsî, kesê ke semedê paştdayîşî serdayîşê înan kenê, asteng kenê. Emîne wina vat: "Nêzdîyê 3 mengî yo ma tîya ronişnenê ro. Çira dîmenê ma yê nêweşxaneyî nînê vetene. Ez kiştoxanê tutanê xo gêrena. Dewlete çin a, edalet çin o la zulm esto. Ma şêrê ça? Qey ma vera zulmî peynîya cuya xo bîyarê? Danê ma ro. Çira dozgerî nê gunayî kena milê xo?"

 

'Ma do xover bidê'

 

Sewbîna Keyeyê Şenyaşarî serê hesabê xo yê medyaya komelî de “#adaletigetireceğiz (#madoedaletbîyarê)” nê mesajî pare kerd: "Nê qalxanê ke yenê berzkerdene, bi amancê astengkerdişê waştişê ma yê edaletî yo. Pêwa pêro mudaxaleyan û destbednkerdişan zî ma verê Edlîyeyê Rihayî de yê. Ma do bêveng nêamnê û ma do xo ver bidê."