Rojda Aydin  

 

ŞIRNEX - Cinîya Ebûbekir Denîz, Dîvan Denîz, 20 serrî yo semedê edalet bi ca bêro û kiştoxî bêrê muhakemekerdene, cigêrayîşê xo yê edaletî dewam kena. Dîvane dîyar kerd ke 20 serrî yo pey edaletî de ya û vat: "Heta peynîya emrê xo ez o pey dewaya xo bî û ez o xo biresnî cenazeya xo."

 

Serekê HADEPyî yê Silopîyê Şirnexî Serdar Taniş û îdarekarê qezayî Ebubekîr Denîz, dimayê ke şî Qereqolê Cendirmeyan ê Qeza îfade bidê, nêgêrayî keyeyê xo. 20 serrî yo keyeyî bendeyê agêrayîşê Serdar û Ebûbekirî yo. Keyeyî bi serran o aqûbetê înan pers kenê û tu wext fek cigêrayîşê edaletî vera nêdanê. Dadgeha Heqê Merdiman ê Ewropayî (DMME) derheqê vinîkerdişê Ebûbekir û Serdar de cezaya tazmînatî Tirkîya ra birna. Cinîya Ebûbekir Denîzî, Dîvan Ebûbekir, ajansê ma rê qalê babete kerd.

 

'Serra 2001 de heta ewro ma tu zanayîş nêgirewt'

 

Dîvane, destpêkê bale ant serê cuya xo û vat: "25ê çeleyî 2001ine de çawişê pispor Taşkin Akyûnî ke Qereqolê Merkezê yê Fermandarîya Qeza de wezîfedar bi û veng da Serdar Taniş û mêrdeyê mi ke îfade bidê. Mêrdeyê mi û Serdar Taniş bi texsî şî qereqole semedê îfade bidê. Dimayê ke nêameyî ma verê xo da qereqole. Ma ra vatî, 'ê nêameyê qerekole.' Dima ra zî vatî, 'karê înan ê îmza estbî eştî û şî.' La dima ra vatî, 'şêrê kam veng da yo înan bipersê.' A roje ra nat, înan ra tu zanayîş nêame girewtene. Ma xeylêk rey muracat kerd, la pêro bênetîce mend."

 

'20 serrî yo dejê ma dewam keno'

 

Dîvane, hêvî kena ke rojêke cenazeya înan bidê û vat: "Ma şî Kerboran û ma ra vatî, 'cenazeya şima ya.' Ma 7 mengî pabeyê cenazeya xo mendî, labelê nîşanê m anêdayî. Dimayê çend mengî mîyanê batanî de çengêk esteyî estbî. Labelê a cenaze ê ma nêbî. Ma çengêk esteyê ma zî bibo, ma wazenê. Çimê tutanê mi rayîrê pîyê înan de yo. Ma hêvî kenê ke rojêke agêro. Mîyanê 20 serran de cuya ma de dej û hêvî kêm nêbi. Dejê ma 20 serrî yo dewam keno, la hêvîya ma esta."

 

'Tutê mi bê pîyê xo pîl bî'

 

Dîvane dewam de wina vat: "Ma roşanan bi zerreşikte pêşwazî kenê. Wextê roşanî de şar şino goristananê xo. Eke gorêk mêrdeyê mi bibayîne û ma zî bişîne serdayîşê ey. Tutê mi her wext behsê vîrardişê pîyê xo kenê û goristanê ci pers kenê. La cewabê ci verê ma de nîyo. Ez hema zî nêeşkena bîyarê serê ziwanê xo vajî, pîyê şima ame qetilkerdene. Tutê mi 20 serrî yo bê pîyê xo pîl benê."

 

'Ez o heta peynîya emrê xo cigêrayîşê xo dewam bikerî'

 

Dîvane tewr peyîn wina vat: "Tena mêrdeyê mi ney, bi hezaran kesî ameyî vinîkerdene. Cayê ke ma muracat bikerê, nêmend. Labelê heme muracatê ma bê netîce mendî. Tarîxê merdişê mêrdeyê mi qeydan de derbas nêbeno. Wextê weçînayîşî kaxidê raya ci yeno. Labelê ma do qet fek vera nêdê. Kam berpirsîyaro wa bêro muhakemekerdene. Ma wazenê edalet bêro. Ma cenazeya xo wazenê. Ma do heta peynî pey dewaya xo de bê û heta peynîya emrê xo ez o cigêrayîşê edaletî dewam bikerê."