Rojda Aydin

 

ŞIRNEX - Pîroz Olmez ke dewa Melêse ya Elkê de manena, serê cuya dewe de qisey kerd û vat: "Dewe de pêro karî bi taybetî serê milê cinîyan de yo. Her çiqas cuya dewe zehmet bo hende zî weş a. Dewa ma sey cenetî ya. Cuya şaristanî semedê ma weş nîya. ma cuya dewe tu wext bi şaristanî nêdanê û fek na dewa ke sey cenetî ya vera nêdanê."

 

Dewa Melêse ya qezaya Elkê ya Şirnexî de wayîrê tarîxêk kanî ya, bi ameyîşê wisarî dir bi zergûnayî û vilan xemilya. Pîroz Olmez (52) ke na dewe de manena, derheqê cuya dewe de qisey kerd û vat, aye cuya dewe qet bi cuya şaristanî nêvurnena.

 

Pîroze vat, aye dewa Elemûnî ya qezaya Qilebanî ra ya û dimayê ke zewicyaya dewa Melesî de bi ca bîya. Pîroze wina vat: "Dewe de ma debara xo bi pesdewarî kenê. Ma fêkî û sebzeyan ramnenê. Sewbîna ma cinî her mewsîmê wisarî dir verê xo danê pincar û tewir bi tewir arêdanê. Dewe de cuyêka xozayî esta. Dewa ma dewêka zaf weş a. Bi xozaya xo merdiman ecêp verdena." 

 

‘Her çiqas cuya ma zehmet ba zî weşîya ci zî esta'

 

Pîroze, dîyar kerd ke ê serê sibayî rew wirzenê, dest bi roje kenê û wina qal kerd: "Dimayê ke ma wirzenê arayîya xo kenê û dima ra dest bi karê keyeyî kenê. Dima ra ma şinê bêrî, pesê xo ancenê. Ma ê şitî anê kenê mast û penêr. Ma qasê werdê xo verdenêû zêde zî benê roşenê. Ma roje de di rey pesê xo ancenê. Wextê wisar newe dest pêkeno, ma roje ra reyke pesê xo ancenê. La wexto ke hamnan yeno, ma roje di rey ancenê. Sewbîna ma şinê ko,  pincarê tewir bi tewir kom kenê. Ma semedê zimistanî darenê we û hem zî semedê werdî roşenê. Pincar wisarî yeno komkerdene, wextê ke bimano qert beno. Mewsîmê bînan de vaş nîno komkerdene û werdene. Ma ko de çi pincar bivînê anê. Nê pincarî semedê weşîye zî baş ê. Cuye û debara ma wina ya. Zehmet bo zî ma debara xo kenê. La vîrusê koronayî tesîr serê ma de zî kerd. Sewbîna ma nanê xo zî bi xo pewjnenê. Dewe de cuye zehmet a, la weşîya ci zaf ê. Sewbîna ma kulturê xo yê destkarî zî dewam kenê."

 

'Cinî kedêke pîl danê'

 

Pîroze tewr peyîn wina vat: "Ciwanê nika zêde hes nêkenê dewan de bimanê, semedê ke kar çin o û tedayê dewlete zî serê ciwanan de hîna zêde yo. Semedê nê zî ciwanî verê xo danê şaristanan la şaristanî sey zîndanan ê. Sewbîna bi taybetî karê dewe bi destê cinîyan yeno kerdene. Cinî kedêke pîl danê. Wextê ke nêweşî virazênê, cinî bi dermanê xoza înan baş kenê. Ma tedawîya xo bi xo kenê. Çi beno wa bibo, ma fek dewa xo ra vera nêdanê."