AMED - OHD ke raporê derheqê tupê gonîyî yê ke Goristanê Bêkesan yê Yenikoyî de ameyî vînayene, eşkera kerd û dîyar kerd beno ke tupê gonîyî demêk derg o binê herre de mendê.

 

Şubeyê Komeleya Huqûqnasan ê semedê Azadîye (OHD) yê Amedî derheqê tupanê gonîyî ke 13ê Gulane de Goristanê Yenikoyî yê Rezanî de ameyî vînayene, raporê muşahadeyî de eşkera kerd. Rapor de ame dîyarkerdene, beno ke tupê gonîyî demêkê derg o binê herre de mendê. Dimayê îxbarî polîsî amebî serê goristanî û tupê gonîyî kerdibî binê asayîşî labelê zabitname nêgirewtibî.

 

Rapor de ame vatene wareyêkê nêzdîyê 50 metre de tupê gonîyî yê qapaxê înan bi rengê kewe, mor, zerd û pembe vilakerdene ameyê vînayene. Ame dîyarkerdene ke gonî hîn tupan de ziwa bîyo, hîn zî ziwa nêbîyê. Reyna ame diyarkerdene tupêk de şilavîyêke zerd esto.

 

‘Tupê gonîyî demêkê derg o binê herre de bî’

 

Rapor de ame dîyarkerdene nuşteyê bi îbareyê Serdozgerîya Komare ya Amedî, Serdozgerîya Komare ya Êlihî, Serdozgerîya Komara ya Mêrdînî, Serdozgerîya Komare ya Farqînî, Serdozgerîya Komare ya Mîdyadî serê tupan esto. Sewbîna ame vatene serê tupan hûmara kîmyayî û hûmara Sazgehê Tipê edlî estê. Ame neqlkerdene xeylêk nuşteyê serê tupan deforme bîyê. Dewamê rapor de wina ame vatene. “Tupê gonîyî demêkê derg o binê herre de bî. Sewbîna ame tespîtkerdene ke hûmara kîmyayî û hûmara sazgehê tipê edlî aîdê serrê 2015 û 2016ine yo. Bi temamê 14 kesî hîn ci ra tena name, hîn zî name û peynameyê înan amebi nusnayene, ameyî tespîtkerdene. Hûmarê ATKyî yê serê 10 tupan ameyîne wendene û hûmara kîmyayî yê serê 8 tupan ameyîne wendene.”

 

Zabitname nêame girewtene

 

Rapor de ame vatene nêzdîyê 100 tupî ameyê vînayene û wina vat: “Dimayê ke cigêrayîş û tespîtê wareyî saete 15.00 de ma 155 gêrayî. Polîsê ke ameyî cayê wareyê tupê gonîyan kerd binê asayîşî. Labelê zabitname nêame girewtene. Dimayê polîsî cayê serebûtî ra şî, tespîtê ke ma girewtî ma zabitnameyê ci zî girewt û ma peynî de xebata tespît û muşahadeyî ard.”