Rojda Aydin

 

AMED - Roniştoxê dewa Eskara ya Pasûrî dîyar kerdî operasyonê ke 7 rojan dewam kerd, tesîr serê dewe û xoza kerd û vatî: "Bi serran o tîya operasyonî yenê kerdene. Tewr peyîn cayêkê operasyon ame kerdene de boyêka cîya ameyîne. Sewbîna pêwa mexdûrîyetê ke ma semedê operasyonan ciwîyenê, xoza zî yena texrîpkerdene.”

 

 Bejayîyê dewa Eskara ya qezaya Pasûrê Amedî de 13 gulane de operasyonê leşkerî amebi destpêkerdene û operasyon heta 19ê gulane dewam kerd. Dekewtiş û vejîyayîşê dewe amebi qedexekerdene. Herême de şebekeyê telefonan amebi birnayene û merdimê dewijan ê ke şaristanan de yê 4 rojan nêeşkayî xo biresnê merdimanê xo. Roniştoxê dewe yê ke ajansê ma rê qisey kerdî, bale antî serê tesîrê operasyonî.

 

‘Roşan ma rê bi jehr’ 

 

Neslîhan Yaman 15 serrî yo dewe de ciwîyena wina vat: "Wextê operasyonê leşkerî bejayîyê dewe de yenê destpêkerdene, ma kewenê mîyanê endîşeyan. Tutê ma ê koyan de şiwanî kenê. Gama ke ma vejênê teberê keyeyanê xo ma tersenê. Hemverê dewa ma her wext operasyonê leşkerî yenê kerdene. Roja ke operasyonî dest pêkerdî, şiwanê dewe bejayî de bî. Ma demêk derg şiwanan ra zanayîş nêgirewt, ma vat qey ameyê kiştiş. Nêzdîyê cayê operasyonî de keyeyêk estbi la ma 7 û 8 rojan zanayîş keye ra nêgirewt. 13ê gulane de operasyon dest pêkerd û heta 19ê gulane dewam kerd.” 

 

Neslihane qiseykerdişê xo de bale ant serê tesîrê operasyonan û vat: “Xora 13ê gulane roşanê Remezanî bi û o wext operasyon ame destpêkerdene. La ma bi operasyonê leşkerî roşan peşwazî kerd. A roje ma rê bi jehr. Mêrdeyê mi heywanan berdibi çêrnayîş û semedê operasyonî heywanê ma telef bî. Semedê mêrdeyê mi nêame, ma kewtî mîyanê endîşeyan. Dimayê ke mêrdeyê mi ame ma tay rehet bî. Bi teyareyê şerî bejayî ameyî bombardumnkerdene û dima ra zî helîkopterî şî cayê operasyonî. Ma keyayê dewe û qorîcîyê derûdorî gêrayî ma ra çîyêk nêvatî. Sewbîna hewl danê ke ma bitersnê û dewe ra vejê.”

 

‘Serra 90î de zî dewa ma ameye veşnayene’

 

Fahriye Yaman zî dîyar kerd serra 90 de zî semedê operasyonê leşkerî, teda û zulmê dewlete koçê Pasûrî kerdê û vat: “Serra 90î de dewa ma ameye veşnayene û ameye talankerdene. Ma zî verê xo da Pasûr. Dimayê çend serran, wextê rayîrê dewa ma ameye akerdsne, ma reyke bîn agêrayî dewa xo. Wextê ma amebî dewe, keyeyê ma nêmendîbî, pêro amebî veşnayene. Ma reyke bîn keyeyê xo viraşt. Dima ra ma xo rê heywanî girewtî û reyna cuya xo dewe de dewam kerd. Verê ra operasyonê leşkerî dewa ma de yeno kerdene. 13ê gulane de reyna dewa ma de ame destpêkerdene. O wext di şiwanê ma zî bejayî de bî û ma înan ra zanayîş nêgirewt. Ma kewtî mîyanê endîşeyî. Dima ra şiwanêk cilê xo vet û berz kerd, veng da. Ma zana ke ha ciwîyenê. 7 rojî dewa ma kerdî binê ablûqa. Ma heywanê xo zereyê dewe de çêrnayî. Vernîya operasyonî leşker û tîmê taybetî ameyîne dewe la ma nêzanayîne do operasyon dest pêbikerê. Semedo ke operasyon esto ma nêefterenê şêrê ko. Ma nêeşkenê heywananê xo wey bikerê. Sewbîna destûr nîno dayene ke ma şêrê Pasûr zî. Wextê operasyonî de boyêka cîya estbî, ma bi şikdarê ke çekê kimyewî tîya ameyî xebitnayene. Ma êdî şer nêwazenê û wa peynîya şerî bêro.”

 

'Wextê operasyonî de boyêka cîya ameyîne’

 

Zekîye Yaman zî derheqê operasyonî de wina vat: “Roşanê Remezanî de operasyon ame destpêkerdene û roşanê ma kerdî jehr. Roja operasyonî di tutê mi ko de verê heywanan de bî. Çend rey pê ser vengê teqayîşî ame. Bi jet û helîkopteran hereme gulevaran kerdî. Semedê vatî birayê to ame kiştene, kênaya mi dewxe ra şî. Ma keyayê dewe ra ambulans nêwaşt, la wesayîtêk şawit. Mi kênaya xo şawit nêweşxane û heta şan de nêweşxane de mende. Dima ra ma zanayîş girewt ke tutê mi ciwîyenê. Operasyon ra 9 heywanê ma telef bî. Vanê herême de kamera ameyê bicakerdene. Semedê nê ma teber de nêşinê destawe. Demê operasyonî de boyêke ameyîne, ma vat qey darê ke veşayê la ma dima ra musayî ke çekê kîmyevî ameyê xebitnayene. Wextê operasyonê leşkerî de ma nêeşkenê keyeyê xo ra vejîyê. Cayê ke helîkopter wirzenê, darî ameyê birnayene. Cayê operasyon ameyo kerdene de zî darî ameyê veşnayene. Ma sey roniştoxê na dewe ciwîyenê êdî şer nêwazenê û ma wazenê bi zerrîyêka rehet dewe de biciwîyê.”