WAN - Hemserekê TUHAY-DER û DBPyî bale antî serê çalakîya grevê vêşanîye ke tepişteyan bi waştişê tecrîdê serê Rayberê PKKyî Abdullah Ocalanî wirzo dayê destpêkerdene û vatî, ganî tecrîd wirzo û pêvînayîş bêro kerdene.

 

Tecrîdê giran yê serê Rayberê PKKyî Abdullah Ocalanî ke 22 serrî yo zîndanê Tîpa F yê Îmraliyî de tepişte yo, her ke şino tewr giran beno. Tepişteyê PKK û PAJKî bi amancê tecrîd û binpaykerdişê heqan ê zîndanan peynî bibo, 27ê teşrîna peyêne 2020 de dest bi grevê vêşanîye ya bêdem û bidor kerdî. Çalakî roja 182yîne de dewam kena.

 

Hemsereka Komeleya Paştdayîşî û Hetkarîya bi Keyeyê Tepişteyan (TUHAY-DER) Kudret Temel û hemsereka Partîya Herêma Demokratîk (DBP) ya Wanî Gulderen Varli derheqê grevî de ajansê ma rê qisey kerdî.

 

‘Tepişteyê nêweşî nînê dermankerdene’

 

Kudret Temel dîyar kerd ke demê peyîn de operasyonî zêde benê û çarçewaya nê operasyonan de bi desan kesî yenê destbendkerdene û sewbîna zîndanê Panos, Tîpê T, F û Asayîşê Berzî ya Wanî de binpaykerdişê heqan her ke şino giran beno û vat: “Rojname û kitabî wextê xo de nînê dayene. Pêvînayîşê telefonî yê keyeyan dir bi kêfî yenê girewtene. Tepişteyê ke îtîrazê binpaykerdişî kenê zî rastê cezayê hucre û surgunan yenê. Tepişteyê nêweşî nînê dermankerdene. Yê ke semedê nêweşxane muracat kenê zî reyan heta mengêke yenê vindarnayene.”

 

‘Her çî di rey vay yeno rotene’

 

Kudrete bale ant serê probleman û vat: “Semedê pandemî, lazimîyê sereyîn xeylêk rey nînê peydakerdene. Heto bîn ra zî semedê krîzê ekonomî keyeyî xeylêk rey nêeşkenê şêrê serdayîşê tepişteyanê xo. Xeylêk keyeyî bi di serrî yo zêdeyo nêeşkenê şêrê serdayîşê tepişteyanê xo yê ke şaristananê bînan de tepişteyê. Kantînan de her çî di rey vay yeno rotene. Tu wijdan nê bêhuqûqî qebûl nêkeno.”

 

‘Wa ganî peynîya tecrîdî bîyarê’

 

Kudrete tewr peyîn wina vat: “Sebebê binpaykerdişan tecrîdê Îmraliyî yo. Xeylêk rey tepişteyan hemverê tecrîdî dest bi grevê vêşanîye kerdî. Semedê nê zî tepişteyî cuya xo ra bî. Ma reyke bîn nêwazenê ke nê grevî agêrê yê bêdem û bêdor. Ma veng danê wezaretê dade; Heqê tepişteyan çîyo bidê. Goş bidê waştişê tepişteyan. Ganî tecrîd peynî bibo.”

 

‘Muxatab birêz Ocalan o’

 

Gulderen Varli zî bale ant serê tecrîdî û vat: “Demê peyîn de serê îdiayê Sedat Peker yê derheqê wezaretê karê zereyî de yeno vindarnayene. Çîyo ke bêro kerdene zelal o. Dozgerî ganî vera nê îdiayan cipersayîş bido destpêkerdene û çîyo lazim o bikero. Nê welatî de feqîrî, binpaykerdene bi 40 serrî yo bi krîzêk pîl yeno îdarekerdene. Ma reyke bîn zî vanê û ma bi desan rey vatibi. Semedê welat aram bibo, problemî çareser bibê ganî problemê kurdan bêro çareserkerdene. Muxatabê problemê kurdan Birêz Ocalan o. Ganî tecrîd wirzo. Yan zî do krîz tewr zêde giran bo.” Gulderene tewr peyîn veng da selahîyetdaran û vat ke ganî hemverê grevê vêşanîye bi hîsgêr bê.