AMED - Serdozgerîya Komare ya Amedî, îdanameyê ke derheqê Ayşe Kara de amade kerd, ci rê heta 10 serrî cezaya zîndanî waşt.

 

Rojnamegere Ayşe Kara çarçewaya cipersayîşê ke Serdozgerîya Amedî de derheqê Kongreya Komeleyê Demokratîk (KCD) dabî destpêkerdene, 26ê Hezîrana 2020 de amebî destbendkerdene. Ayşe dimayê ke ameye destbendkerdene,  3 rojan ra dima yanî  29ê Hezîrane de bi şertê kontrolê edlî amebî veradayene. Nê ser o Serdozgerîya Komare ya Amedî derheqê Ayşe de bi sucdarîyê "endamîya rêxistine" îdaname amade kerd. Îdanameyo ke ame amadekerdene de dozgerî, semedê Ayşe heta 10 serrî ceza waşt.

 

Taqîbkerdişê xeberan bi delîlê suc

 

Îdanameyê ame amadekerdene de ame îdakerdene,  "Ayşe, endama Kongreya Cinîyan ê Azadan (KJA) û endama Komeleya Rojnamegeran ê Azadan a, mîyanê KCDyî de xebityaya." Sewbîna îdanameyê derheqê Ayşeye de ame dîyarkerdene ke serra 2016 de semedê xeberan taqîb bikera Mêrdîn de bîye û Rayrayîşê Botanî ya Partiya Aştî û Demokrasî (BDP) zî ca gêna.

 

Îdianameyî de, îfadeyê Ayşe rê zî ca ame dayene. Ayşe dîyar kena ke aye endama KCDyî nêya, la sey rojnameger tewrê çalakîyanê KCDyî yê derheqê çapemenî û kongreyî de beşdar bîya. Sewbîna Ayşe vana ke aye rojnameger a, endama Cemiyetê Rojnamegeranê Azad a û endama KJAyî nîya.

 

Dozgerî dimayê cigêrayîşê serê dosya de kerd, derheqê Ayşe de bi îdayê "endama rêxistine ya" heta 10 serrî ceza waşt.

 

Îdanameyo ke ame amadekerdene hetê 5in Dadgeha Cezaya Giran ya Amedî ra ame qebulkerdene.