MERKEZÊ XEBERAN - Înîsîyatîfê Pawitişê Kurdistanî ke PDKyî destûr nêda Hewlêr de eşkerayîya çapemenîye bido, Silêmanî de eşkerayîye daye.

 

Parlamenter, senator û sîyasetmedarî zî tede bi desan kesan heweteyo ravêrte cayanê cîyayan ê dinya ra verê xo dabi Hewlêrî. Grûba 150 kesan ra zafê înan ya tebersînor bîyî ya zî destûr nêdîyake şirê Hewlêrî. 70 endamê Heyetê Haştîye ke Hewlêr de mendî seba ke waştiş û nêrazîbîyayîşê xo bîyarî ziwan waşt vêrê Neteweyenê Yewbîyayan (NY) ê Hewlêrî de eşkerayîye bide la PDKyî destûrê înan nêdabi. Polîsan otêla aktîvîstan girewtbî binê ablûka. Aktîvîstan otêle ra eşkerayîye dabî û eşkera kerdbi ke înan Înîsîyatîfê Pawitişê Kurdistanî îlan kerdo.

 

Înîsîyatîfo ke qerardar vera hêrişê îşxalî semedê ardişê haştîye xebata xo rê dewam keno seba ke Hewlêr de destûr nêdîya eşkerayîya ci ewro Silêmanî de eşkerayîye daye.

 

Eşkerayîyê înîsîyatîfî de wina ame vatene: 

 

“Ma semedê vindarnayîşê hêrişê îşxalî yê vera Kurdistanî ameyî tîya ke rewşa şarî ca de vînê tay pêvînayîşan bikerê. Îdareyê PDKyî pêvînayîşê ma yê bi aktoranê sîyasîyan asteng kerdî û 50 embazê tebersînor kerdî. Xora 27 embazê ma zî nêeşkayî biresî Hewlêrî. Nê qedexeyê seyahatî sîyasî yê hetê ci yê fermî çîn o.

 

Bado ke ma Înîsîyatîfê Pawitişî îlan kerd destûr nêdîya ma şirê verê NYyî û hetê hêzanê asayîşî ra ma fîzîkî ameyî tacîzkerdene. Ma nê zextê PDKyî şermezar kenê. Ma sey meymanî ameyî la sey sûcdarî ameyî pêşwazîkerdene. Wa mero vîrakerdene ke hêrişê îşxalî yê dewleta tirke huqûqê mîyanneteweyî binpay keno ke çîyo wînayên nêno qebulkerdene.

 

Seba ke hêrişê vera Başûrê Kurdistanî cadê bêro vindarnayene û pêro hêzê tirkî û leşkerê cîhadîstî yê kîrakerdeyî apey bêrê antene waştişê ma nê yê:

 

*Başûrê Kurdistanî de îşxalê tirkan, vurnayîşo demografîh, bêduzenîye û pakîya etnîke vindarnê.

 

*Texrîb û talanê xozaya Kurdistanî vindarnê.

 

*Hêzê mîyanneteweyî û herêmîyî hemkarîya xo ya bi Tirkîya biqedînê

 

*Ma paştî danê tewirê hemparî yê partî, dezgeh, şar û gerîlayanê kurdan ê vera îşxalê tirkan

 

*Rojhelatê Mîyanênî û Dengizê Sipî de projeyê îşxalî yê Neo-Osmanîyan ê Erdoganî rê ney

 

*Tewr peynî de wa Kurdistan îşxalî ra bêro pakkerdene”

 

Badê eşkerayîye înîsîyatîf do gorê Sekreterê Pêroyî yê YNKyî û Serekkomero verên Iraqî Celal Talabanî zîyaret bikero. Reyna do gorê Rayberê Têgêrayîşê Goranî Newşirvan Mustafa û Hunermenda Kurde Merziye Resazî û gorê şehîd pêşmerge û gerîlayan ê ke Girdê Seyvan de yê bêrê zîyaretkerdene.

 

Înîsîyatîf 17ê hezîrane de Silemanî de do tewrê rayraşîyayîşê vera şerê zereyî yê kurdan bibo. Eşkerayîye de semedê tewrbîyayîşê nê rayraşîyayîşî zî ame vengayene.