DÎLOK - Çarçewaya paştdayîşê huqûqî de Emîne Şenyaşar û lajê ci Ferît Şenyşar yê Dîlokî de yê do bi Serekê Pêroyî yê CHPyî Kemal Kılıçdaroglu dir pêvînayîş bikerê.

 

Pirsûsê Rihayî de vernîya weçînayîşê 24ê Hezîrana 2018ine Parlamenterê AKPyî Îbrahîm Halîl Yildiz, merdim û pawitoxê ci hêriş kerdî û hêriş de Haci Esvet Şenyaşar û lajê ci Adil û Celal Şenyaşar amebî qetilkerdene. Emîne Şenyaşar û lajê ci Ferît Şenyaşar ke hêriş de birîndar bibi, 9ê Adare de verê Edliyeyê Rihayî de dest bi çalakîya nobeta "Edaletî" kerdê. Çalakîya ‘Nobeta Edaletî’ ya Keyeyê Şenyaşarî vernîya Edliyeyê Rihayî de roja 103ine de dewam kena. Emîne û Ferîtî semedê nobete qerar dayî ke bajarê cîyan de dewam bikerê. Keyeyî vizêr Dîlok de dest pêkerdî. Serdayîş ewro roja diyîn de ya. Vizêr bi Baroyê Dîlokî, Partîya Saadetî, Partîya Sibaroje, Partîya Demokratîke ya Şaran (HDP), Sendîkayê Kedkarê Zanistî û Perwerdeyî (Egitim Sen) serdayîş ame kerdene û waştişê paştdayîşê huqûqî ame kerdene. Ewro zî yeno pawitişî ke Serekê Pêroyî yê CHPyî Kemal Kılıçdaroglu yê çarçewaya Komxebata Serekê Şaredarî de Dîlokî de pêvînayîş bêro kerdene.

 

'Tepişteyêk çin o'

 

Keyeyê serê hesabê xo yê medyaya dîjîtalî de wina pare kerd: "Têkoşînê ma yê edaletî roja 104ine de yo û Dîlok de dewam keno. Rihayî de  T.Cyî ra cîya huqûqêk cîya yeno kerdene. Vernîya qamerayê asayîşî de Nêweşxaneyê Dewlete de 3 merdimî yenê qetilkerdene. 3 serrî yo dewa nêameya akerdene. Tepişteyêk çin o! Beno ke şima bawer nêkerê la no rast o."