ENQERE - Arjîn Yuksekbag ke Zîndanê Cinîyan ê Sîncanî de tepişteya, dîyar kerd mektubê ke Dersîm Dag ya HDPyije rê şawita, hetê îdareyê zîndanî ra ameyo wendene û wina vat: "Mektubê ke sazgehê fermî û kesan rê yenê şawitene, tu hawayî nêeşkeno bêro akerdene û wendene û bêro kontrolkerdene. La zîndan qanûnan çin hesibneno û heqê tepişteyan xesp keno. No helwestêk sîyasî yo.”

 

Tedayê serê komelî her ke şinê zêde benê û no tesîr serê zîndanan de zî keno. Zîndanan de bi seyan tepişteyê sîyasî her roje bi binpaykerdişê heqê yê newe ra yenê rî bi rî, tepişteyê nêweşî nînê dermankerdene. Tepişteyê sîyasî 27ê Teşrîna Peyêne de hemverê tecrîdê serê Rayberê PKKyî Abdullah Ocalan û binpaykerdişê heqan kewtî grevê  vêşanîye yê bêdem û bidor û 206 rojî yo pey xo de verda.

 

Yew merkezê binpaykerdişê heqan zîndanê cinîyan ê Sîncanî yo. Yeno zanayene ke xeylêk tepişteyê nêweşî dermankerdişê înan nênokerdene û yeno taloqkerdene. Tepişteyî babeta ke nêvejîyenê wareyê hempar û bernameyan, nêrazîbîyayîşê xo anê ziwan û dîyar kenê ke vurnayîşê odeyan bi hawayêk keyfî nêno kerdene. Tepişteyî helwestê gardîyan û îdarekarîyê zîndanan rexne kenê û vanê ke qanûnê keyfî têgeyrenê. Reyna eynî zîndanî de semedê grevê vêşanîye derheqê tepişteyan de cipersayîş dayî destpêkerdene û tepişteyî şîbî dozgerîye de îfade dabî.

 

Zîndanê Cinîyan ê Sîncanî de tepişteya bi nameyê Arjîn Yuksekbag ajansê ma rê mektubêk şawit û binpaykerdişê heqan qal kerd.

 

Arjîne dîyar kerd ke Gulana 2017 de Êlih de ameya destbendkerdene û dimayê çerçewaya cipersayîşî de aye berdê Kirşehîr û uca de 10 rojan destbend kerde menda, dima ra berdê Zîndanê Cinîyan ê Sîncanî. Arjîne di serrî bi îdiayê ‘endamîya rêxistine’, ‘propagandayê rêxistine’ ra ameye muhakemekerdene û 9 serrî û 9 aşmî ceza ci rê ameye birnayene. Arjîne 4 serrî zîndanê Sîncanî de tepişteya.

 

Mektubê Arjîne ke ajansê ma rê şawito wina yo:

 

“No demêk derg bi taybetî semedê pandemî babeta mektuban de xeylêk probleman ma ciwîyenê. Bi kêfî yan erey danê yan zî qet nêerşawenê. Yan zî sey çin ê têgeyrenê. Coka mi waşt na rewşe şima dir pare bikera.  Semedê nuşteyê Kurdkî estbi, açarnayîşê ci ameyo kerdene û şawitene. Tewr peyîn mi  Parlamentera HDPyî ya Amedî Birêz Dersîm Dag rê zerf şawit. Demêk derg mektub zîndan de ame vindertene. Bi desan rey mi waşt ke  aqûbetê mektubî bimusa la cewab nêdayî waştişnameyê mi. Nê ser mi dadgeha berz rê gerre kerd, ez musaya ke hewteyê vîyarte de mektubê mi resayo. Eynî roje de dadgeha corî  ra teblîg ame û mi dî ke bahaneyêk cîya dayê vernî. Teblîg de wina ameyîne nuştene; 'Waştişnameyê xo de semedê Dersîm Dag ke sey parlamentera HDPyî ya Amedî behs kena, mektub zerf de ameyo şawitene, la vato ke hema mektub nêresayo. Goreyê rêziknameyê têkildar de mektubo semedê mercîyê fermî û avûkatî yenê şawitene, çerçewaya kontrolî de yo. Semedê nê mektubî semedê kes/a taybetî yeno şawitene ameyo akerdene, nuşteyê Kurdkî ameyo açarnayene û şawitene...'

 

Bi nêzdîbîyayîşêk sîyasî nêzdî bîyê

 

Sey rêziknameyî de zî ameyo vatene, mektubê ke sazgehê fermî û kesan rê yenê şawitene, bi tu hawayî nêeşkeno bêro akerdene û kontrolkerdene. La rêziknameyê zîndanî çin ameyo hesibnayîş û heqê mi ameyo xespkerdene. Bi nêzdîbîyayîşê sîyasî nêzdî bîyê. Semedê ke serê zerfî de adresê merciyê fermî, adresê TBMMyî estbi. Yeno îdiakerdene ke mektub semedê kesa taybet ameya şawitene. La sey yeno îdiakerdene nîyo. Mi sazgehêk fermî û kesêka parlamentere ya şawit. Na rewşe hîn persî xo dir ard.  Na yena a mana ke mektubê heta nika ma sazgehê fermî rê şawitê ameyê wendene û heta belkî zî nêameyê şawitene.

 

Sûcê xo kamufle kenê

 

No demêkê yo ma problemê winasî dir yenê rî bi rî. Taqîbkerdişê mi zaf di ca de bîyo. Yo balkêş oyo ke mektub ameyo akerdene, nuşteyê kurdkî ameyo açarnayene û ameyo şawitene. La mektubo ke ganî nêameyîne akerdene, akerdê û goreyê rêziknameyî tênêgeyrayê. Bi nê eşkerayîyan zî tena sucê xo kamufle kenê.

 

HDP hîrên partîya pîl ya Tirkîye ya

 

No rastîyêk o, HDP hîrên partîya pîl ya Tirkîye ya û Birêz Dersîm Dag zî se ra 80 Amed rayî girewta û ameya weçînayene. La na rastî peygoş kenê û bi qerarê ke atmosferê sîyasî nîşan dano, bahane nîşan dayê. Ez nê terzê vatişî û bahaneyî qebul nêkena, ma do nêkerê û  heta peynî ma do taqîbkerdox bê."