Derya Ren

 

RIHA - Dayîkê endamê Însîyatîfê Dayîkê Aştîye  yê Stenbolî ke şî serdayîşê Emîne Şenyaşar wina vatî: "Cayê ke edalet çinî bo her kes pare xo gêno. Êdî bes o! Ma wazenê ke edalet bêro."

 

Cigêrayîşê edaletî ya Emîne Şenyaşar ke qezaya Pirsûsî ya Rihayî de verê weçînayîşê 24ê Hezîrana 2018 de tûtê xo û mêrdeyê xo hêrişê merdim û pawitoxê parlamenterê AKPyî Îbrahîm Yildiz de vinî kerd, dewam keno. Emîne Şenyaşar û lajê ci Ferît Şenyaşar ke serebûtî de birîndar bi verê Edliyeyê Rihayî de 9ê Adare de çalakîya roniştişî yê ‘edaletî’ dayî destpêkerdene û çalakî roja 105ine de dewam kena.

 

Endamê Însîyatîfê Dayîkê Aştîye ê Stenbolî dîyar kerdî ke çalakîya nobeta ‘edaletî’ ya ke Emîne û Ferît Şenyaşar dayê destpêkerdene û roja 101 de ya zaf girîng û bimana ya û vatî, sere de Dayîkê Aştîye û heme kesê ke edalet gêrenê paştdayîş bidê keye.

 

'Ma bêdadî û bêhuqûqî qebul nêkenê'

 

Dayîka Aştîye Guler Bugday vat, wa êdî hesrê dayîkan nêvarê û vat: "Yê ke şer kûr ra hîs kenê dayîk ê. Dayîka Emîne zî nînan ra yew a ke na cofrafya de ciwîyena û para xo ya dejî girewta. Nika nê welatî de xebitnayîşê vatişê, ‘edaletî’ sey sucêk pîl yeno vînayene. La no baş bêro zanayene ke bêedaletî ra her kes nesîbê xo gêno. Ma dayîkî her wext bîyarê ziwan ke lazimî bi edalet esto. Ma do tu wext bêdadî û bêhuqûqî qebul nêkerê."

 

'Ters çare nêyo'

 

Bedîa Gokguz zî vat ê bi serran o edalet gêrenê û vat: "Mi Emîne her roje televîzyon de dîne. La dimayê ke ez ameya mi aye dî, mi dî ke dej senîn ancena. Dayîka Emîne bi mengan o baxçeyê edlîye edalet gêrena. Ganî her dayîke destê xo bida serê wijdanê xo û têkoşîn bikera. Ka edalet ça de yo? Ka merdimayî? Çira semedê dayîka Emîne edalet bi ca nîno? Ez veng dana pêro dayîkan; bêrê ma dayîka Emîne dir têkoşînê edaletî bidê. Heme kesê ke edalet gêrenê, ganî bêrê verê dayîka Emîne. Çira dayîkê kurdan rê edalet çin o? Çira hend etersenê? Ters çare nîyo. Ganî waştişê Emîne bica bêro."

 

'Wa edalet bica bêro'

 

Hikmiyet Onel zî wina vat: "Ma Dayîkê Aştîye wazenê ke edalet bica bêro. Pêro dinya dayîka Emîne vînena. La her kes çiman û goşê xo padano. Polîs mudaxaleyê kesê ke yenê serdan keno. A cinî uca de çîyêk xirab nêkena, edalet gêrena. Ma zî wazenê ke lajê dayîke serbest bêroveradayene. Emrê Emîne pîl o, ganî aye zî sey pîranê bînan keyeyê xo de binişno ro. La wazena ke berpirsyarê qirkerdişî hesab bidê."

 

Hîkmiyet tewr peyî vat, sere de Emîne Erdogan û heme cinî paştdayîş bidê Emîne Şenyaşar û wina qedêna: "Ma semedê paştdayîşî ameyî tîya. La polîsan dorê ma pada. Dima ra nasnameyan kontrol kerd. Ma semedê paştdayîşê a cinî şî. Ma semedê her kesî vanê edalet."