Gulîstan Azak

 

AMED - Dewa dewikê Pire ya Bismilî de camêrdo bi nameyê Aslan Karakaş ke desteştişê Emîne Karakaş kerdêne, hewil dabi ke bi çek aye bikişo û Emine bi giranî birîndar kerdibi. Emîneya ke nêweşxane de tedawî bîne, merde.

 

4ê Sibate de Bismilê Amedî de Aslan Karakaş (34) nêzdîyê serrêke desteştişê Emîne Karakaş (16) kerdêne û eynî wextî de aye tehdîd kerdêne ke ey dir bizewicyo, bi çek giranî Emîne birîndar kerdibi. Ame zanayene ke Emîne Nêweşxaneyê Fakulteya Tipê ya Unîversîteya Dîcleyî ya Amedî de tedawî bîne 138 rojî ra dima, roja dişeme merfa. Versuc Aslan Karakaş zî hema nêameyo destbendkerdene.

 

Do cenazeya Emîne serê waştişê dayîka ci dewa Tepêyî Bismilî de bêra definkerdene.  

 

‘Aslan Karakaş yeno pawitene’

 

Dayîka tûte Nûrcan Karakaş ard vîr ke Aslan Karakaş bi rojan o nêameyo destbendkerdene û dîyar kerd ke Aslan hetê dewlete ra yeno pawitene. Nûrcane vat: "Aslan Karakaş bi mengan dest û lingê xo kil kerdêne, gêrayîne û tûta mi zî beşê lezgîn de têkoşînê cuye dayîne. Edalet reyna para camêrdan kewt. Aslan Karakaş nêno destbendkerdene. No zî yeno a mana ke hetê dewlete ra yeno pawitene. Xora keyeyê ci bi serran o qorucîtî keno. Qasê ke mi şinawito dosya yena nimtene û Aslan Karakaş zî verê merdimêk xo de maneno. Nêvînayîşê versucêkê cayê şikî nêbo çî yo?”

 

‘Mi kênaya xo nêeşka dewa xo de defin bikera’ 

 

Nûrcane dîyar kerd ke keyeyê versucî înan tehdîd kerdo û vat: “Semedê tehdîdî ma mecbûr mendî cenazeya Emîne dewa Tepê de defin bikerê. Mi nêeşka tûta xo dewa xo de defin bikera. Asayîşê ganê mi çin o. Aslan Karakaş hema teber de yo û yeno pawitene. Ez paştdayîşê rêxistinê cinîyan omid kena.”

 

Sewbîna Merkezê Heqê Tûtan ê Baroyê Amedî dîyar kerdî ke do dewa taqîb bikerê.