Sema Çaglak  

 

ÊLIH - Gulsûm Kaplan ke bi serran o debara xo bi ramitişê çîlegan kena, dîyar kerd ke xeylêk çîlegê ci semedê krîzê ziwatî ra wişk benê û berardişê înan destê înan de maneno.

 

Ramitişê çîlegan ke zehmetî û kedêke pîl wazeno, menga nîsane de û mewsîmê payîze de dest pêkeno. La emsar hem semedê tay varnayîşê varanî, hem zî semedê ziwatî tesîrê xo serê çîlegan de zî kerd. Gulsum Kaplan ke debara xo bi ramitişê çîlegan kena, xeylêk çîlegê ci bêawî ra wişk benê û berardişê ci destê înan de manenê.

 

'Sey serrê vîyarte berardişêk baş nêyo' 

 

Gulsume dîyar kerd ke bi 6 serrî yo karê ramitişî yê çîlegan kenê û vat: "Serra ewilî ma ramenê labelê hend ezêde hebî nêdanê. Ma xeylêk kedêke pîl danê. Şefeq ra heta şan de înan dir eleqedar benê. La sey serê vîyarte berardişêk baş çin o. Xeylêk şitilê ma wişk benê. Ma înan awe zî danê la reyna feyde nêkeno. Ma menga nîsane de eşka tay bêroşê la dima ra çîlegê ma destê ma de mendî. Hem semedê krîzê ekonomî hem zî semedê krîzê ziwatî ma kewenê mîyanê rewşêka tengî."

 

'Zehmetîyê ci xeylêk ê' 

 

Gulsume wina dewam kerd: "Hem hetê ramitişî de, hem hetê arêdayîşî de xeylêk kede wazena. Ma zaf zehmetî vînenê la hemverê keda xo nêeşkenê bigîrê. No zî ma xemgîn keno. Serrê ewilan de xeylêk bi bereket bî, hêvîyêka zaf pîl bî. La ma nika eewnîyenê, her ke şino hêvîya ma qels bena. Ma kîloyê çîleganê xo 7 tl ra roşenê."

 

'Ma reyan nêeşkenê heqê gubre û dermanan vejê' 

 

Gulsume tewr peyîn wina vat: "Dimayê ke mi dî çîleganê ma wişk bê û heb nêdanê mi zî mabêne înan de balîîcan hîn tewirê sebzeyan zî ramit. Ceribnayîşêk wina mi kerd. Eke yê ke verê veresî de yê virazyê, ez o dima ra ceribnayîşê xo yê bi nê şiklî zêde bikerî. Ma gubre û derman zî kenê. La wina ma kêm roşenê ke ma nêeşkenê heqê gubre û dermanê zî vejê."