Marta Somek

 

STENBOL- Hunermendî derheqê qetilkerdişê Denîz Poyraz û wedaritişê Pêkerdişê Stenbolî de qisey kerdî û vatî: "Man êdî sereyê xo nêtewênenê. Ma ne fek pêkerdişê Stenbolî ra vera danê, ne zî hemverê qetilkerdişê Denîz Poyraz sere nêtewênê."

 

17ê Temmuze de Onur Gencer hemverê HDPyê Îzmîrî de hêriş kerd û Denîz Poyraz qetil kerd. Kiştox Onur Gencer hetê polîsan ra ame pawitene û vera ey reaksîyonî dewam kenê. Sewbîna semedê Pêkerdişê Stenbolî ke do 1ê Temmuze de bêro wedaritene, reaksîyonê cinîyan dewam keno. Hunermend Denîz Tekîn û Rewşan Çelîker derheqê qetilkerdişê Denîz Poyraz û wedaritişê pêkerdişê Stenbolî de ajansê ma rê ercnayîş kerdî.

 

'Ma nêwazenê zanayîşê qetilkerdişê cinîyêke bîn bigîrê'

 

Hunermend Denîz Tekîn dîyar kerd pêkerdişê Stenbolî pêwa ke mekanîzmayê pawitişî û çarçewaya tedbîrê bi tesîr de girîng o, hetê serekkomar Tayyîp Erdogan ra nîmeyê şewe ame feshkerdene û vat: "1ê Temmuze de do bêro wedaritene. Xora baş bica nêardêne, la wedaritişê ci do cinî û kesan mexdur bikero. Bi wedaritişê pêkerdişî dir tewr zêde do cinîyî mexdur bibê. Ma bi hûmare, grafîk û îstatîstîkan behs kenê. La no karê hukmatî yo. Ma nêwazenê xeberêka bîn ya qetilkerdişê cinîyêke bieşnawê."

 

'Cinî şermezarkerdiş ra weta ganî xoverdayîş bikerê'

 

Denîze dîyar kerd ke motîvasyonê sereyîn yê hêrişê hemverê HDPyî cîya yeno ramojnayene û ganî şermezarkerdiş ra wetayêr xoverdayîşêk bêro kerdene û wina vat: "No hêrişêk hemverê temsîlkarîyê demokratîkîya şarê Kurdî bêro naskerdene zî bi taybetî no hêrişêk hemverê cinîyan o. No qetilkerdişê embazêke ma yo."

 

'Do têkoşînê cinîyan dewam bikero' 

 

Rewşan Çelîke zî dîyar kerd kayê lêşinî yenê kaykerdene û vat: "No demêk derg o têkoşînê cinîyan hem hemverê hêrişê camêrdan, hem zî hemverê hêrişê dewlete dewam keno. Heme reng û ziwana de merdimî semedê têduştî û cinî semedê azadî kuçeyan de yê, meydanan de çalakîyan kenê. Cinîyî semedê cuyêka baş, demokrasî û heqê merdiman her wext vengê xo berz kenê."

 

'Ma sere nêtewênenê' 

 

Rewşane vat, ê êdî nêwazenê bêrê kiştene û vat: "Ma nêwazenê nê kayê lêşinan de bêrê xebitnayene. Ma wazenê semedê tûtanê xo cuyêka bi rumet û weşe verdê. Gelo do cinî heta ça sereyê xo bitewênê. Ma êdî sere nêtewênenê. Ma fek Pêkerdişê Stenbolî ra vera nêdanê. Hewteya vîyarte de Denîza erjîyaye ameye qetilkerdene. Kezeba keyeyêk ameye veşnayene. Keyeyêk qedîya. Çîyêk destê ma ra nêno. Cinîyî tena vengê xoberz kenê. Cinîyî do vera hêrişan vengê xo her wext berz bikerê. Ma hemverê hêrişan sere nêtewênenê û fek pêkerdişê Stenbolî ra vera nêdanê."