STENBOL - Cinîyan reaksîyon vera qetilkerdişê Denîz Poyraz dayî û dîyar kerdî ke Denîzêke şêra do hezar Denîzî bêrê û vatî, dayîka Denîze zî tena nêya.

 

Hemverê bînaya HDPyî ya Îzmîrî de hêriş amebi kerdene û hêriş de xebatkara partîye Denîz Poyraz ameye qetilkerdene. Hemverê  qetilkerdişê Denîz Poyraz de reaksîyonî dewam kenê. Kiştoxê Denîze, Onur Gencer zî jhetê polîsan ra sey bêro pawitene amebi nimtene û berdibî. Hemverê nê reaksîyonî dewam kenê. Cinîya bi nameyê Kumrîye Akgul û Gulsum Ozturk reaksîyon vera qetilkerdişê Denîze û hedefgirewtişê HDPyî dayî û dîyar kerdî ke dewlete hemverê kurdan çim û goşê xo padana.

 

'Dewlete qirkerdiş dî la çimê xo pada'

 

Kumrîye Akgul dîyar kerd ke aye qirkerdiş şermezar kena û wina vat: "Belê, ewro Denîzêk şîye la bi hezaran Denîzî do bêrê. Ez hemverê dayîka Denîze û heme dayîkan bi rêzdarî sere tewênena. Ma qetilkerdişê Denîze qebûl nêkenê. Qirkerdiş verê çiman de ame meydan. No qirkerdişo faşîst ame kerdene la eke dewlete biwaştêne eşkayîne vernîya ci bigîra. Vernîya bînaya HDPyî de çadirê dewlete estê. Gelo senîn bi ke nê qirkerdişînêdî. Kiştox bi çek kewt zere, senîn nêdî. Dewlete nê qirkerdişî rê çimanê xo pada."

 

'Do bi hezaran Denîzî bêrê’

 

Kumrîye dewam de wina vat: "Qirkerdiş bi plan amebi kerdene. Wextê nê planî kerdî, zanayîne kombîyayîşê HDPyî esto. Planê înan qirkerdişêk pîl bi, la planê înanxira bi. Werrekna embazana ma Denîze nêşîne. Ez qirkerdiş lanet kena. Wa dewlete bizana ke Denîzêk şîye la do bi hezaran bêrê. Dayîka Denîze tena nêya, bi seyan dayîkê aye estê."

 

'Ma meydanan terk nêkenê'

 

Gulsum Ozturk zî reaksîyon ramojna û vat: "Denîz Poyraz ameye qetilkerdene la ma semedê ci meydanan de, kuçeyan de yê.  Kam ci ziwan, dîn, nîîjad beno wa bibo ma kîşte cinîyan de yê. Ma hem semedê Denîze û hem zî semedê Pêkerdişê Stenbolî meydanan û taxan terk nêkenê. Ma do heta peynîya emrê xo têkoşîn bikerê. Ma do bi tûtanê xo dir wareyan de bê. Tacîzker, tecawuzker û dizdî ceza nêgînê. Çira cinî, tûtî û ciwananê ma kişenê. Êdî bes o. Ma semedê hema şaran aştî wazenê. Cinî ciwîyayîş azadî.”