Sema Çaglak

 

ÊLIH - Endamê Dayîkê Aştîye yê Êlihî derheqê tepişteyan de endîşeyê xo ard ziwan: "Hemverê zulmî de ganî ma wayîrê tepişteyan vejîyê. Semedê nê zî m atêkoşînê xo pîl bikerê."

 

Hemverê tecrîdê hemverê Rayberê PKKyî Abdullah Ocalan û binpaykerdişê heqê tepişteyan 27ê teşrîna peyêne 2020 de zîndanan de Tirkîya û herême çalakîya grevê vêşanîye amebi destpêkerdene. Çalakî bi koma 43yîn 215 rojî yo dewam kena. Çalakîya grevê vêşanîye ke hetê multecîyanê Kampa Lavrîo yê Yunanîstan de ameya destpêkerdene 177 rojî yo dewam kena. Sewbîna çalakîya grevê vêşanîye ke hetê Meclîsê Îştarî ya Wargehê Multecîyan ê Şehîd Rustem Cûdî (Mexmûr) ra ame destpêkerdene 194 rojî yo dewam kena.

 

Pêwa dewamkerdişê grevî dir rewşa tepişteyan her roja ke şina ver bi tehluke şina. Semedê grev de tewr zêde heqê tepişteyan yeno binpaykerdene û yê nêweşî nênê dermankerdene. Xeylêk sazgeh û dezgehê sîvîlî eşkerayî dayî û bale antî serê rewşa tepişteyan. Keye û merdimê tepişteyan rewşa tepişteyan ra bi endîşe yê. Endamê Dayîkê Aştîye yê Êlihî bal eantî serê çalakîye û vengdayîşê wayîrvejîyayîşê waştişê tepişteyan kerdî.

 

‘Tecrîd serê ma hemine de yo'

 

Leyla Onar dîyar kerd zulm û îşkenceyê serê tepişteyan bi tu hawayî nêno qebulkerdene û vat: "Xeylêk tepişteyî nêweş ê û binê zulmî de yê. Nênê dermankerdene û her roje heqê tepişteyan yeno binpaykerdene. Ma zî sey dayîkî rewşa tepişteyan rê xeylêk bi endîşeyîn ê û wazenê êdî waştişê tepişteyan bêro qebulkerdene. Tecrîd serê ma hemine de esto. Ma wazenê êdî no tecrîd peynî bibo. Zulm û îşkenceyê serê tepişteyan nêno qebulkerdene. Dewlete zî sey çîyêk winasî çin o hesibnena la ganî heme kesî hayeye înan na çalakî ra bibo. Ganî her kes wayîrê tepişteyan vejîyo."

 

'Waştişê ma tena aştî û demokrasî yo'

 

Amîne Onar dîyar kerd ke şarê nê welatî edalet û huqûqî rê vêşan û têşan ê û vat: "Ganî tepişteyî bêrê dermankerdene. No zulm heta ça do şêro. Wa waştişê tepişteyan bêro qebulkerdene. Ez edaletê rastî hêvî kena. Huqûq û edalet nê welatî de nêmendo. Waştişê ma tena aştî û demokrasî yo. Waştişê edaletî, waştişê pêro şaran o. Eke aştî bica bêro do no zulm zî biqedîyo. Semedê nê ganî şar hemverê tecrîdî têkoşîn bikero."

 

'Çi destê ma ra bêro ganî ma bikerê'

 

Dîlber Kaplan zî wina vat: "Bi seyan tepişteyî zîndanan de grevê vêşanîye de yê. Ne werdê înan, ne zî lazimîyê înan bi ca anê. Ê mîyanê şert û mercê giranan de semedê edalet, aştî û azadî bedenê xo dayê verê mergî. Labelê ganî ma zî qasê ke destê ma ra bêro ma wezîfeyê xo bica bîyarê. Nê wareyî de çi ma ra ame ganî ma bikerê û bieşkê çalakîya tepişteyan rê bibê cewab. Bêvengîya ma tu çîyêk çareser nêkeno, eksê ci tewr kûr keno."

 

Dîlbere bale ant serê weşîya tepişteyan û vat: "Ma vînenê ke her ke şino rewşa tepişteyê ke grev de yê tehluke ver şino. La tu tedbîr nênê girewtene û bi no hawa endîşeyê ma zêde benê. Çalakîya grevê vêşanîye semedê zorberdişê faşizmî çalakîyêke tewr bingeyîn o. Ganî her cayê dinya ra wayîrvejîyayîşêk bibo."