Medya Uren

 

MÊRDÎN - Sultan Gok û Cîhan Okmen ke rezê înan veşa reaksîyon ramojnayî û vatî: "Debara ma, keda ma ya çend serrî verê awe de şî. Xeyşêk heywanî zî qetil bî. Do nê hesabî kam bido?”

 

Adirê bi dewa Biertî ya Mehsertî kewt çar dewê bîn yê bi nameyê Mercê, Metîna, Kurka Cor û Kurka Cêr vila bi û bi hezaran donim daristanî û rezî veşayî. Adir 29ê Hezîrane de saete 9.00 de dest pêkerd û heta vizêr şan de zî dewam kerdêne. Roniştixê nê dewijan û dewijê cîranî bi îmkanê xo hewl dayî adir bitefnê. Cinîyê ke rezê înan veşayî ajansê ma rê qisey kerdî û vatî, eşkayîne tewr lez mudaxale biameyîne kerdene.

 

‘Ma hem sey madî hem zî psîkolojî zirar vînenê’

 

Sultan Gok destpêkê qiseykerdişê xo de bale ant serê veşayîşê daristanan û vat: "Her rey ma adirê wina dir rî bi rî manenê.  Ma zanê ke nê çolan de kes çin o. Leşker û qorîcî estê. Teberê înan de kes nêno nê hetî. Ma her rey zirarê pîlî vînenê. Nê tena zirarê madî û psîkolojî nêyê. Şewa bîn tutê mi ranêkewtî. Adir nêzdî bi û vatêne do bireso ma. Ma şahid nêyê ke kamî adir eşto la Homa kesê ke wina kerdê rê nêverdo.”

 

‘Erey mudaxaleyê adirî kerdî’

 

Sultane dewam de wina vat: "10 donim erdê mi veşa. Debara ma heme serê ê erdî de bi, erd zî veşa. Nika ma do se bikerê? Nê dewijê feqîrî se bikerê? Nika semedê tefinayîşê adirî ma cade xebere da berpirsyaran. Dimayê xebera ma 2 saetî dima ameyî û hema tqm adir nêtefênabî ware terk kerdî. Eşkayîne tewr leze bitefênê. Serebûtê wina de lazim o hîsgêrî nêzdî bibê.”

 

‘Destê ma de çîyêk nêmend’

  

Cîhan Okmen zî bale ant serê zirarê ke dîyê û vat: "Bi qasê hezar û nîm donim zêdeyêr erd veşa. Eke ma dewijan ra nêbîne do hîna girs bibîne. Ma dest bi dest tefêna. Bi qasî 700 hezarî zêdeyêr darê fêkîyan veşayî. Nê dewijê ke rezê înan veşayê do emsar perîşan bibê. Xora emsar semedê varan tay bi, berardiş zî kêm bi. Na rey êyê ke bîyê zergûn zî veşayî. Ez ê xo vajî; erdê mi heme mêwî bî û heme mêwê mi veşayî. Mi mêwe xo kerdêne dims, kerdêne bastîq û eşkic. Mi bi nê rengî debara xo kerdêne. Labelê nika destê mi veng bi.”

 

‘Keda ma ya çend serrî reyke de bî welî’

 

Cîhane tewr peyîn wina vat: "Bi seyan heywanî uca de veşayî û merdî. Heywanê ma veşan mendî. Ma bi ê vaşî înan mird kerdêne. Nika o zî destê ma ra vajîya. Ma welatijê feqîr ê. Belkî înan rê şewat girîng nêbo. La verê ma de xozaya ma çin bena. Keda ma ya çend serran reyke de bî welî. No zaf serê ma de tesîr keno. Hêvîdar a ke na rewşe rê çareserîyêk bêro vînayene. Ma qîmê tefinayîşî nêkenê.”