Berîtan Canozer -Sema Caglak  

 

AMED - Aysel Gultekîn ke karê ramitişî kena, bi makîneyê fotografî zî weşikîya 4 mewsîman ancena. Aysele, dîyar kerd ke pêwa zor û zehmetîyan serê lingan de mendiş girîng o û vat: "Xoaverberdişê cinî, pêwa zor zehmetîyan girîng o û la ganî cinî xo ver bida."

 

Cinî hêz û ganebîyayîşê xo, her çî mîyanê xo de hewênena. Heskerdiş û manadayîşê xo sepernena estetîk û weşikbîyayîşê xoza. Têkiliyê cuye û cinî ke bi zergûnbîyayîşê herre dir destpê keno, bi reng û rîtmê xo dengeyê erd û asmênî viraznena. Aysel Gultekîn (25) ke rîtm û rengê xoza ruhê xo de dana ciwîyayîş, hem kedkarê ramitişî û hem zî bi makîneyê xo weşikbîyayîşê xoza ancena.

 

Aysele qezaya Çinarê Amedî de ciwîyena û 16 serrî yo zîyan de xebityena. Her mewsîmî de kedêke pîl dana. Pêwa kede û zehmetîyan Aysele nê formê cuye goreyê ferasetê cuya xo neqş kerda. Aysele vana, her çiqas zehmetîyê cuye zêde bê zî, wextê cuyêka hayeyê ci  hişmendîyê xo biba, her şert û mercan de eşkena bîyayîşê xo ramojna.

 

'Ma tutîya xo nêciwîyayî'

 

Germbîyayîşê nîmerojî de şewqê tîre rojî xo danê rîyê Aysele. Aysele dîyar kerd ke xeylê cinîyê dewe, tutîya xo ra dest bi nê karî kenê û vat: "Ma her wext zîyanan de xebityayî. Mi 9 serre ya xo de dest bi nê karî kerd. Ma hem aqijî bî, nêverdayî ma biwanê. Cuyêka newe vernîya ma de bî. Xeylêk cinî sey min ê ke tutîya xo ra çîyêk fam nêkerdê. Xebata zîyanî semedê ma hema qijî de dest pêkena."

 

'Mi rê makîneyê fotografî girewtî'

 

Aysele bale ant serê makîneyê fotografê xo û vat: "Ez mîyanê xoza de detayêk weşik bivînî, ez ancena. Verê zî fotografkêşî semedê mi girîng bi. Zêdeyêr xoza bala mi ancena. Gama ke simbilêk bivîna, yan zî çûçikêke û vilekêke bivîna ancena. Mi fotografê ke antêne, serê medyaya dijitalî de pare kerdêne. Fotografê mi zaf bale antêne. Wina 3 û 4 serrî derbaz bi, mi her wext fotografan pare kerdêne. Semedê hetê ekonomî de îmkanê mi çinbi, mi nêeşkayîne xo rê makîneyê fotografî bigîrî. Çend embazê mi vînayî ke ez fotografkêşî ra hes kena, mîyanê xo de serê twitterî de çalakîyêke kerdî. Mîyanê yewbînan de pere kom kerdî, mi rê makîneyêkê fotografî girewtî. Ez xeylêk pê kêfweş bîya. Semedê ma yewbînan rî bi rî nêdîbi û no çi mi rê zaf girîng bi. Ez nika tîya weşikîya 4 mewsîmî ancena."

 

'Fotografê mi bale ancenê'

 

Aysele dîyar kerd ke serê fotografê ci de xeylêk ercnayîşê weşî yenê kerdene û coka wazena xo hetê fotografî de aver bera û vat: "Xeylêk kesî xoza ra ked û herre ra dûr kewtê. Coka wextê ez ê fotografan vejena vernîya înan, kêfweş benê. Ez çiqas erjê înan vînena, hewl dana ke hîna zêde detayanê weşan bigîra û no het ra xo aver bera."