STENBOL - Avûkatan, wasî û keyeyê Rayberê PKKyî Abdullah Ocalanî semedê pêvînayîşî muracatê neweyî kerdî.

 

Avûkatanê Abdullah Ocalanî ra Rêzan Sarica, Raziye Ozturk, Faîk Ozgur Erol û Cengîz Yureklî seba ke roja dişemeyî muwekîlê xo reyde pêvînayîş bikerê muracatê Serdozgerîya Komare ya Bursa kerd. Birayê Rayberê PKKyî Abdullah Ocalanî Mehmet Ocalan û wasîyê ci Mazlûm Dînç û keyeyanê tepişteyan ê bînan ê Îmraliyî ra birayê Omer Hayrî Konarî Alî Konarî, birayê Hamîlî Yildirimî Polat Yildirim û waya Veysî Aktaşî Melîhe Çetîn zî bi rayîrê avûkatanê xo seba pêvînayîşî muracat kerd.

 

Serdozgerîya Komare ya Bûrsayî, bi bahaneyê Ocalanî serra 2009 de pawitişê bi nameyê "Xerîtaya Rayîrî" Dadgehê Heqê Merdiman ê  Ewropa (DMME) rê şawitib, 23ê Êlule 2020 de 6 mengî cezaya qedexeyî avûkatanê Abdullah Ocalanî rê birnabi. Pêwa cezaya qedexeyê avûkatan 23ê Adare de peynî bî zî reyna avûkatî nêeşkenê şêrê Îmraliyî û ne negatîf û ne pozîtîf cewab înan rê nîno dayene.

 

Avûkatanê Abdullah Ocalanî, Rêzan Sarica û Newroz Uysal, dimayê 8 serrî mabêne 2-22ê Gulane, 12-18ê Hezirane û 7ê Gulana 2019 de şîbî Îmrali.

 

Abdullah Ocalan 22 serrî yo Zîndanê Tîpê F yê Îmraliyî de tena 2 rey bi telefon keyeyî dir qisey kerd. Abdullah Ocalan ke 22 serrî yo tecrîd de yo, reya ewil 27ê Nîsana 2020 de tena 20 deqîqeyan bi telefon dir qisey kerd. Tewr peyîn serê îdeayê medyaya komelî de vila bî, dimayê reaksîyonê komelî 25ê Adara 2021 de Edliyeyê Rihayî de tena 4.5 deqîqeyan bi rayîrê telefonî birayê xo Mehmet Ocalanî dir qisey kerd û telefon nîme de amebê birnayene.