WAN - Cinî hemverê tedayê Tirkîya ke bi destê PDKyî hemverê Herêma Federal a Kurdistanî de yeno kerdene, reaksîyon ramojnayî û vatî: "Barzanî bi nê hêrişan peynîya xo ano. Wa bi vîyarteyê xo dir rî bi rî bêro û bifikrîyo. Rijnayîşê gonîya wayê û bira tu çîyêk bi înan nêdano qezenckerdene."

 

Hêrişê Tirkîya yê hemverê Herêma Federal a Kurdistanî dewam kenê û helwestê Partîya Demokratîke ya Kurdistanî (PDK) zî hetê şarê Kurdî ra rastê reaksîyonê pîl yeno. PDK bi taybetî paştdayîşê semedê Arteşê Tirkî bi eşkera nîşan dano û no zî beno sebebê reaksîyonê şarê Kurdî. Cinîyan, hemkarîya PDKyî ya polîtîkayê şerî de û nêçareserîyê problemê kurdî de rexneyê xo ard ziwan.

 

'Gonîya waye û bira tu qezenc nêano' 

 

Devlet Çîftçî dîyar kerd ke bi serran o polîtîkayê ke ‘Kurdan yewbînan dir danê qedênayîş' yenê kerdene û vat: "Ez hêrişê bi destê PDKyî yeno kerdene, şermezar kena. Ez veng dana serekê PDKyî Mesut Barzanî, rijnayîşê gonîya kurdan do çîyêk bi to nêdo qezenckerdene. Ma vanê ke meyerê nê kayan. Bêrê ma dest bidê yewbînan. Ma wayê û birayê yewbînanê. Ma aştîye wazenê. Ma şer nêwazenê."

 

'Wa Barzanî vîyarteyê xo bîyaro vîr'

 

Adalet Akdîn zî hêrîşê DAIŞî yê hemverê Iraq û Herêma Federal a Kurdistanî ard vîr û vat: "Ma nêwazenê yewbînan bikişê. Eke ma wayîrê Barzanî nêvejîyê, kes wayîr nêvejîyeno. Wextê DAIŞî hêrişê Kerkukî kerd, reyna kurdan Barzanî xelas kerd. Wa o wext bîyaro vîrê xo. Dimayê rijnayîşê pîl ê DAIŞî Barzanî çi qezenc kerd. Wa vîyarteyê xo dir rî bi rî bêro. Rijnayîşê gonîya waye û bira çîyêk nêdano qezenckerdene. Ma reyke bîn reyna kenê. Ma şer nêwazenê."

 

'Barzanî peynîya xo ano'

 

Hayrîye Kipçak zî dîyar kerd ke PDK dem bi dem yeno kayê dewletanê teberî û bi talîmatê înan têgêrenê û vat: "Barzanî goreyê berjewendîyê kurdan tênêgêreno. Semedê berjewendiyê kurdan polîtîkayan nêweçînenê. Eke Barzanî wina dewam bikero, do peynîya xo bîyaro."