ENQERE - Avûkate Semra Demir,  hedefmojnayîşê Denîz Poyraz hetê  Serekê Pêroyî yê MHPyî Devlet Bahçelî warê huqûqî de erjna û vat: "Vatişê ke semedê Denîz Poyraz ameyî kerdene, parçeyêk hêrişî yo.  Hedefmojnayîşê Devlet Bahçelîyî hetê huqûqî ra suc o. Bi nê rengî hewil dano ke tesîr serê hukmî de bikero coka ganî dewa Devlet Bahçelî bêro akerdene."

 

Bi hêrişê serê bînaya Partîya Demokratîke ya Şaran (HDP) ya Îzmîrî xebatkara partîye Denîz Poyraz amebî qetilkerdene. Dimayê Denîz Poyraz ameye qetilkerdene dima Serekê Pêroyî yê MHPyî Devlet Bahçelî bi vatişê "terorîst" Denîz Poyraz sey hedef mojnabi ra. Hemverê qetilkerdişê Denîze xeylêk het ra reaksîyonê xo ramojna û  çalakî ameyî kerdene. Xebitnayîşê vatişê, "terorîst" ê hetê kesê hetgirê îqtîdarî ramojna ke bîyo sebebê qetilkerdişê Denîz Poyraz.

 

'Huqûq esto çin o no beno babete munaqeşeyî' 

 

Semra qetilkerdişê Denîze şermezar kerd û wina vat: "Wextê babete bena cinî û HDP, huqûq esto çin o beno babeta munaqeşeyî. Hemverê qetilkerdişê Denîz Poyraz xeylêk hetan ra reaksîyon ameyî mojnayene. Hukm kenê binê tesîrê xo. Xora ma dî tehqîqatêk bêhetgir nêkenê. Zaf leze tehqîqat derbaz kerdî û kesê Denîze qetil kerd, zaf leze tepiştî. Nê vatişî semedê tesîr serê dozger û darazî bikerê, maeyî kerdene. Ma eşkenê vajê, sere de binpaykerdişê muhakemeyê adîl esto."

 

'Ganî dewa Devlet Bahçelî rê bêro akerdene'

 

Semra bale ant serê qanûnan û vat: "Qanûnêko 'rêzgirewtişê semedê kesê merde' ê huqûqî esto. No qanûn merdan paweno. Heqaretê vîarardişê kesê merde TCKyî de sey suc ca gêno. Coka tîya de Devlet Bahçelî sûcek keno. Bi taybetî wextê babete cinî bo, nê vatişî tewr zêde kewenê vernî. Vatişê semedê Denîz Poyraz ameyî kerdene, parçeyêk hêrişî yo. Hedefmojnayîşê Devlet Bahçelî hetê huqûqî ra suc o. Bi nê rengî hewil dano tesîr muhakameyî bikero coka ganî dewa Devlet Bahçelî rê bêro akerdene. Hêrişê hemverê Denîz Poyraz eynî wextî de hêrişê hemverê heme şaran o. Coka wareyê huqûqî de çi lazim bikero ma do bikerê."

 

'Beşdarê têkoşînê rêxistinkerde bibê' 

 

Semra tewr peyîn wina vat: "Zîhnîyetê ke Denîze qetil kerd û zîhnîyetê Pêkerdişê Stenbolî wedarit eynî zîhnîyet o. Nika Tirkîya mîyanê tabloyêkê zaf xirab de ya. Ma cinîyî nêeşkenê destkewtişê xo yê bi serran ra fek vera bidê. La cinî reyna zî bi hêzê xo yê rêxistinkerde eşkenê vernîya kiştişan bigîrê. Ez veng dana cinîyan ke beşdarê têkoşînê rêxistenkerde bibê. Eke ma pîya têkoşîn bikerê, ma do bieşkê vernîya qetilkerdişî bigîrê. Ganî hêrişê serê ma de bêceza nêmanê. Reyna a ke edalet bîyara cinî ya."