STENBOL - Cinîyê ke 1ê temmuze de kuçeyê Îstîklalî de ameyî têhet, dîyar kerdî ke wedaritişê pêkerdişî qebul nêkenê û vatî do têkoşînê înan dewam bikero.

 

Bi vengdayîşê Koma Kampanyaya Pêkerdişê Stenbolî bi ca bîyaro, hemverê wedaritişê Pêkerdişê Stenbolî de 1ê temmuze de cinîyî Taksîm Tunelê de ameyî têhet û bi fermî wedaritişê pêkerdişî protesto kerdî. Xoverdayîşê ke cinîyan meydan de mojna, derbazê tarîx bi û reyke bîn mesaj semedê îqtîdar ame dayene: "Ma hema nêvato qedîya.."

 

Aynur Ergul, Hanim Candan, Gokçe Yilmaz û Sedef Ozer meydanê çalakî de mîkrofonê ma rê qisey kerdî û dîyarkerdene ke gumanbarî bi rehetî teber de gêrenê û vatî, ê qerar nas nêkenê do heta peynî têkoşînê xo dewam bikerê.

 

'Îstîsmar meşrû kerdî'

 

Aynur Ergul dîyar kerd ke do têkoşîn dewam bikerê û dîyar kerd ke cinî her wext kargerîyan, keye, kuçeyan de yenê qetilkerdene, tutî rastê îstîsmarî yenê û wina vat: "Qanûnê îstîsmarê tutan de vatî, 'ganî îspat bikero/a' û bi nê îstîsmar meşrû kerdî. Kiştox, tecawizkerî bi rehetî gêrenê nê welatî de. No qanûnêk senîn o. Yê ke nê qanûnî vetê zî dayîkêke arda dinya. Gelo do siba, disbayî do bi serê tutanê înan de nêro gelo? No qanûno hemverê merdimayî senîn bo gelo?”

 

'Sewbîna rayîr çin o'

 

Hanim Candan zî dîyar kerd ke her tim kuçeyan de bê û vat: "Pêkerdişê Stenbolî do bi ca bêro sewbîna rayîr çin o. Roşê vîyarte de semedê cinîyêke şorte kerd xo pay, rastê tacîzî ameye. Cinîyê ke şorte kerdibî xo pay, ameyî tacîzkerdene. Ma wazenê şan de tena bigeyrê û azad bê. Wa êdî cinî nêrê qetilkerdene."

 

'Do rojê serkewte bêrê'

 

Gokçe Yilmaz zî reaksîyon vera pêkerdişî da û wina vat: "Dimayê wedaritişê pêkerdişî, proses do bi xoverdayîş dewam bikero. Pêkerdiş bi têkoşînê cinîyan ame qezenckerdene û ma nêwazenê peyser game bierzê. Tîya ra tepya têkoşîn semedê ma esas û xeylêk girîng o. Hêvîyê ma hema taze yê. Ganî ma tena nêrê têhet, ganî hemleyê pêroyî bêrê eştene û hêvîya ma esta ke do rojê serkewte bêrê.

 

‘Têkoşîn dewam o’

 

Sedef Ozer zî reaksîyonê xo wina qal kerd: "Pêkerdiş ame betalkerdene. Cinî, LGBTÎ û tutî tîya yê. Ma rastê her tewir şîdetî yenê. Semedê feshkerdişê pêkerdişê Stenbolî de ameyî têhet. Bi serrêke û nîm cinî kuçeyan de têkoşîn kenê. Têkoşînê ma do dewam bikero."