Melîke Aydin

 

ÎZMÎR - Dimayê hêrişê hemverê HDPyî yê Îzmîrî û qetilkerdişê Denîz Poyraze do Îzmîr de mîtîngê ‘Semedê demokrasî boyêk' bêro viraştene. HDPyijan vengdayîşê tewrbîyayîşê mîtîngî kerdî û dîyar kerdî ke ê wazenê hêrişê faşîstî peynî bibê û destpêkê muxalefetêko demokratîk seba înan girîng o.

 

Cepheyê Demokrasî û Kede ya Îzmîrî, dimayê hêrişê vera HDPyê Îzmîrî û qetilkerdişê Denîz Poyraz do Meydanê Gundogdu ya Îzmîrî 8ê Temmuze de mîtîngê bi sloganê, 'semedê demokrasî boyêk' viraznê. HDPyijî semedê mîtîngî tewrê xebate bî û dîyar kerdî ke hêriş hemverê heme Kurdan û şexsê HDPyî de heme bindestan ameyo kerdene û vatî ke mîtîng destpêkê ameyîşê şarî yê hêzê demokrasî yo.

 

'Mîtîng destpêkê ameyîşê şarî yê heme hetan o'

 

Îdarekara HDPyî ya Îzmîrî Ayşe Ozdamar vatişê kiştoxê faşîst Onur Gencer yê dimayê hêrişî, 'zerrîya mi honik bî' ard vîr û vat: "Na nuqtaya peynî ya hêrişê îqtîdarî û hêzê faşîzan yê hemverê HDPyî, hêzê demokrasî, şarê Kurdî û şarê bindestî yo. Ma wazenê ke no hêrişo peyîn bo û no mîtîng bibo destpêkê yewbîyayîşî muxalefetê demokratîk. Kiştoxî nêeşkenê wina bi rehetî şêrê kesan bikişê. Nêeşkenê nê welatî de malê merdiman bidiznê. Nêeşkenê vejîyê televîzyonan û zûranê xo vajê. Îqtîdar êdî nêeşkeno no welatî de daristanan biveşno û pêwa îradeyê şarê Stenbolê vajo, ‘ez nê kanalî viraznena.' Yewin çareserîyê ci esto. Ganî ma bêrê têhet û vindertişêk xurt ramojnê. Ganî heme hetê demokrasî wazenê bêrê têhet."

 

'Hêriş tersê înan ramojneno'

 

Hedîye Korkut zî bale ant serê girîngîyê tewrbîyayîşê mîtîngî û vat: "Denîze partîya ma de ameye qetilkerdene. Şexsê Denîze de waştî ma hemine qetil bikerê. No tersê înan ramojneno. Semedê tersenê hêriş kenê. Partîya ma roj bi roje pîl benaç Nêeşkenê partîya ma padê. Eke bigîrê zî ma do tewr zêde xurt bibê. Ez vengdayîşê wayîrvejîyayîşê mîtîngî kena. Wa her kes tewrê mîtîngî bibo."

 

Endama Kordînasyonê Cinîyan ê HDPyî Berfîn Benzar zî reaksîyon vera hêrişan da û dîyar kerd ke ganî HDP newe ra yewîye awan bikero û vat: 'Maya Denîze vat ‘Denîzêke şî do bi hezaran Denîzî bêrê.' Esas de  Denîze tena ney, waştî şarê Kurdî qetil bikerê. Ma do 8ê Temmuze de ramojnê ke faşîzm senîn yeno rijnaye. Heme kesê hetgirê demokrasî ganî tewrê mîtîngî bibê."

 

Hemsereka HDPyî ya Konakî Hayat Îzgî zî vat ke mîtîng serewedaritiş o û vat, êdî şar nêeşkeno boye bigîro û qiseykerdişê xo wina qedêna: "Xeylêk tedayî estê. Merdimî êdî nêeşkenê qisey bikerê. Ma her roje bi zem û kiştişê cinîyan aya benê. Ma do bi hêzê demokrasî dir semedê rewşa bîyaye ra vajê ney û ma do meydanê Gundogdu de bê."