SÊWAS - Cinîyê elewî bale antî polîtîkayê nêseyyewbînanî ser û vatî: “Welat de hema zî kesê ke nêwazenê vajî; ma elewîyê estî. Ma wazenê bi ziwan, baerî, nîjad, reng, çermû herçîyê xo bêrî qebulkerdene. Ma wazenê heqê xo yê welatîbîyayîşê seyyewbînanîye bigêrî.” 

 

Zafê înan elewî 2ê temmuza 1993î de hunermend û roşnvîrî seba ke tewrê Şayîya Pîr Sultan Abdalî bibê şîbî Sêwas û Otêla Medimakî de raştê hêrişêko faşîzane ameyî. Otela ke hunermend û roşnvîrî tede mendêne dîya adir ver û 33 roşnvîrî û 2 xebatkarê otelî pêro pîya 35  kesan otêle de dinyaya xo bedilnaye. Welatîyê elewî bi wesîleya serrgêra Qirkerdişê Sêwasî (Madimak) ameyî têhet û bale natî polîtîkayê nêseyyewbînanîye ê welatî ser. Welatîyê elewî dîyar kerdî ke ganî her kes bi reng, ziman û bawerîya xo bicuyo.  

 

‘Wa êdî welat de qirkerdiş nêvirazîyo’ 

 

Endama Komîsyonê Cinîyan ê Komeleya Kulturê Eyup Pîr Sultan Abdalî ê Stenbolî Sultan Altun Cevahîre qisey kerde. Sultane destpêkê qiseykerdişê xo de ard ziwan ke ê welatêk de cuyenê û ganî her kes wayîrê ercan bivejîyo û wina vat: “Kesêk kesek ra cîya nîyo. Beno ke fikre merdiman cîya bibo, labelê ma welatêk de cuyenê. Ganî merdimî yewbînan ra nêrî cîyavînayene. Ganî her kes bi hemrayî û weşik pîya bicuyî. Ma nêwazenê êdî no welat de qirkerdiş virazîyî. Ez omud kena ke selahîyetdarê welatî zî nê çîyan ewil bikerê zerrîya xo û dima ra zî bîyarê ziwan ser û ma reyde rayra şêrî.” 

 

‘Wa her kes goreyê cuya xo bicuyo’ 

 

Sultane dewamê qiseykerdişê xo de dîyar kerde ke ganî ciwan bibî wayîrê ferasetêko rind û bawer kena ke ciwan do her çî rê çareserî bivînî û wina domnaye: “Ciwan nêeşkeno hetê şexsan ra bêro rayraberdene. Eke sey ferasete xo têbigêrî ma do mîyanê aştîye de bicuyî. Wa her kes senî wazeno wina bicuwîyo. Kurd, Elewî, Laz, Çerkez, Ermenî kam senî waeno wa wina bikero. Ganî statu bidîyo Cemxaneyan.” 

 

‘Ganî hemverê fikrê merdiman rêzdarî bibo' 

 

Sereka Komîsyonê Cinîyan a Komeleya Kulturê Eyup Alîbeykoy ê Pîr Sultan Abdalî ya Stenbolî, Esengul Kiliç zî wina ercnayîş kerd: "Welat de polîtîkayêk bêtêduştî yeno kerdene. Qanûn bi ca nênê. Berpirsîyar îqtîdar o. Merdimî Madimak de gane ameyî veşnayene. Heqê demê komare dayî ma, ameyî çinkerdene. Eke sîstemê serekîye bêro wedaritene û qanûnê dîn û bêedaletî bêrê wedaritene do baş bo. Eke hemverê merdiman rêzdarî bibo, do qirkerdiş zî nêro ciwîyayene. Ez tersena ke ciwanî bi îhtîmalê qirkerdişî bêrê rî bi rî. Qirkerdişê Çorum, Mereş, Sêwas û Pirsûsî de xeylêk cinî û tutî ameyî qetilkerdene. Qirkerdişî ameyî ciwîyayîş, bêmerdimayî yê. Eke hukmat, dozgerî û her kes wezîfeyê xo bikero do çîyêk zî nêbo. Vernîya dozgeran ameya padayene, rojnameger û roşnvîrê ma tepişteyê. La tacîzker, tecawuzker, dizdî teber de yê. Ma edalet wazenê. Ma  aştî wazenê. Eke aştî çinbo tu çîyêk çin o." 

 

'Dinyayêka ma ci de cuyenê Kerbelayê mazluman a’   

 

Sereka Komeleya Kulturê Elewî ya Kepezê Antalyayî Seher Yilmaz zî dîyar kerd no qirkerdiş û  polîtîkayê bêtêduştî Kerbala ra heta nika dewam kenê û vat: "Dinyaya ke ma ci de ciwîyenê, Kerbelaya mazluman a. Ez sey welatijêka Elewî,  polîtîkayê bêtêduştî yenê ciwîyayîş ra nêrehet a. Kesê ke bi demokratbîyayîş û roşnvîrî bawer ê zî nêrehet ê. Ziwanê bêtêduştî wina aseno ke lez nêqedêno. Bêşik no het ra têkoşînê ma esto. Ez ciwanan ra bi hêvî ya. Demo nêzdî ma Gezî dî. Nê serebûtan de bawerîya ma ya bi ciwanan û roşnvîran reyna girs bi. Nê welatî de girseyêkê hema nêvanê ma Elewî yê, estê. Xo nimnenê. Hêvîdar a ‘Sêwasêk’ bîn nêro ciwîyayene. Ma do her wext têkoşînê xo dewam bikerê. Ma ziwanê bêtêduştî nêxebitnenê. Ma wazenê ke heqê xo yê welatbîyayîşî têduşt bigîrê. Ma wazenê bi ziwan, reng, ol, nîjad, çerm û her çîyê xo bêrê qebûlkerdene."