Gulîstan Azak

 

AMED - Hemsereka DGFî Dîcle Muftuoglu dîyar kerd ke binpaykerdişê heqan yê hemverê rojnamegeran de dewam keno û vat, tena rojnamegeran ney wazenê pêro komelî bê helm, bê boye verdê.

 

Goreyê endeksê 2020î yê Azadîya Çapemenîya Dinya mabêne 180 welatî de Tirkîya rêza 154ine de ya û goreyê Raporê Binpaykerdişê Heqan ê hemverê Rojnamegeran ê Menga Hezîrana 2021î Komeleya Rojnamegeran ê Dîcle Firatî (DGF) tewr tay 68 rojnamegerî tepişte yê. 

 

Goreyê raporê menga hezîrana ke komele eşkera kerdo 2 rojnamegerî ameyê destbendkerdene, 2 hebî ameyê tepiştene, 8 hebî rastê hêrişî ameyê, 2 hebî rastî tehdîd û ferzkerdişê ajanî ameyê,  7 serebûtî de vernîya  rojnamegeran ameyo padayene ke xeberan taqîb nêkerê. Derheqê 6 rojnamegeran de tehqîqat ameyo akerdene, derheqê 4 heban de dewa ameya akerdene, 3 rojnamegeran rê 8 serrî, 5 mengî û 2 rojî cezaya zîndanî ameya dayene, 34 dewayan de 96 rojnamegerî ameyê muhakemekerdene, rojnamegerî zîndan de rastê binpaykerdişê heqî ameyê, RTUKî ceza da 3 weşanxaneyan,  21 xeberan, 2 keyepelê înternetî, 33 muhtewayê çapemenîya dîjîtalî ameyê astengkerdene û rojanemgerêk kar ra ameyo eştene.

 

Hemsereka DFGî Dîcle Muftuoglu derheqê rewşa rojanemgerê Tirkîya de ercnayîş kerd.

 

'Wazenê binpaykerdişê heqan binimnê'

 

Dîcle dîyar kerd ke astengî û binpaykerdişê vera çapemenî, bi amancê cezakerdişê komelî yenê kerdene û vat: "Ma vînenê ke hewl danê binpaykerdişê heqan ê hemverê rojnamegeran binimnê. Muxabirê AFPî Bulent Kiliç wextê fotograf antêne, hetê polîsan ra rastê teda ame, polîsan qirika ci girewtî û hewl dayî ke boy aci bişiknê.  Wan de rojnamegeran xebera welatijê ke helîkopter ra ameyî eştene viraştî, ameyî tepiştene. Tetwan de, rojnameger Sînan Aygul ke xebera îstîsmarkerdişê tut/e viraştêne ame tepiştene. Tirkîya de wazenê ke rojnamegerîy ebikişê, wazenê bêboye verdê."

 

'Raporê ke ma eşkera kerdo tena hetêk ramojneno'

 

Dîcle dewam de wina vat: "Tehqîqat û dewayê hemverê rojnamegeran bêmabên dewam kerdî. RTÛKî semedê kanalê ke îqtîdar rexne kerd 22 ceza, mîyanê 6 aşman de mîyanê serre de, da. Kanalê ke nêzdîyê îqtîdarê yê zî tu ceza nêame dayene. Ma her aşmî rastê binpaykerdişanê neweyan yenê. Semedê nê zî raporê ke ma eşkera kerdo, tena hetê ke aseno yo."

 

'Yewin rayîr paştdayîş o'

 

Dîcle tewr peyîn bale ant serê paştdayîşî û vta: "Yewin rayîrê hemverê hêrişan paştdayîş o. Serra 90î ra hêrişî vera çapemenîya kurdî de dewam kena. Eke paştdayîş hemverê nê hêrişan pîl nêbo, do hêrişî dewam bikerê. Xeylêk rojnamegerî nê vînayî. Rojê vîyarte de  rojnamegeran hemverê polîsan kamera, mîkrofon, fotografê xo dayî ro û reaksîyon vera hêrişê polîsan dayî. No merdimî kêfweş keno. Ganî no yewbîyayîş dewam bikero. Yan zî do hêrişî dewam bikerê. Nê hêrişan de  rojnamegerî tena ney, pêro komel hedef yeno girewtene. Yê ke wazenê bibirnê helmê komelî yo. Ganî ma wina nêzdîyê babete bibê."