RIHA - Emîne Şenyaşar û lajê ci  Ferît Şenyaşar yê verê Edliyeyê Rihayî bi 'nobeta edaletî' roşan pêşwazî kenê wina vatî: "Ma binê zulmî de roşan pêşwazî kenê. Binê zulmî de roşan nêbeno."

 

Emîne Şenyaşara ke hêrişê merdimê Parlamenterê AKPyî Îbrahîm Halîl Yildiz de mêrde û di lajê xo vînî kerd û lajêk aye zî ame tepiştene bi lajê xo Ferît Şenyaşar ke hêriş ra felitya, çalakîya “Nobeta Edaletî” dewam kena. Keye 133 rojî yo verê Edliyeyê Rihayî de waştişê  “edaletî" kenê. Keyeyê Şenyaşarî erefeyê roşanê qurbanî de zî verê edlîye de cigêrayîşê xo yê edaletî dewam kerd.

 

'Gelo binê zulmî de roşan senîn beno?'

 

Ferît Şenyaşar derheqê babete de wina vat: "Siba roşanê qurbanî yo. Ma binê zulmî de ciwîyenê. Gelo binê zulmî de roşanêk senîn beno? Yê ke ameyo sereyê înan zanê. Ma nêwazenê no çî bêro sereyê tu kesî. Hîrê merdimê ma nêweşxane de ameyî qetilkerdene. Birayêk mi zîndan de yo û bi hawayêke bêhuqûqî 38 serrî ceza ci rê birnayî. Hîrê serrî yo hucreyê yew kesî de yeno tepiştene. Ez û dayîka xo têkoşînê xo yê edaletî dewam kenê. Ma wazenê wa no zulm peynî bo. Ma do dimayê roşanî têkoşînê xo hîna girs bikerê. Eke dozgerî wezîfeyê xo nêkenê, wa serê kursîyan de nênişnê ro. Ma do bi qerar têkoşînê xo dewam bikerê."

 

Keyeyî serê hesabê xo yê medyaya dîjîtalî de nê pare kerd: "Heme kesî tehtîlê roşanê qurbanî de yê. Dayîka ma verê edlîye de dimayê EDALETî ya.. Binê zulmî de roşan nêbeno!"