AMED - Meclîsê Cinîyan ê HDPyî yê Amedî ke awankerdişê xo neql kerd û vat, "Ma do rêxistinbîyayîşê xo bi hêz bikerê û bi taybetî hemverê hêrişê serê cinîyan û bi pêroyî zî serê komelî de ma do têkoşîn girs bikerê. Ma amanc kenê ke her şaristanêk de meclîsêk awabn biker."

 

Meclisê Cinîyan ê Partîya Demokratîke ya Şaran (HDP) Amedî, 15ê Temmuze de bi sloganê "Ma semedê azadî xo bi rêxisin kenê, bi ruhê denîzan ver bi azadî de rayîra şinê" awankerdişê xo neql kerd. Endama Meclisê Cinîyan ê  HDPyî yê Amedî Yasemîn Uçer derheqê awankerdişê meclisî de bi amanc û bernameyê ci de ercnayîş kerd.

 

'Bi têkoşînê rêxistinkerde ma do serbikewê'

 

Yasemîne dîyar kerd ke ê do pêro şaristanan de meclisê cinîyan awan bikerê û vat: "Ma vînenê ke ma bi rêxistinê cinî û ciwanan eşkenê rayîr ver bi polîtîkayê hêrîşkar yê hukmatî padê. Ma zanê ke hemverê operasyonê padayîşê yê serê partîya ma, destbendkerdiş û tepiştişan, feshkerdişê Pêkerdişê Stenbolî û qirkerdişê cinîyan tena bi rêxistinbîyayîşî eşkenê bibê cewab. Xora HDP bi partîbîyayîşê xo yê cinîyan nîşan dano ke wayîrê têkoşînê cinîyan ê aktîfî yo. Sey mi sere de vat, hêrişê ke yenê kerdene tewr zêde bi rêxistinbîyayîşî esto."

 

'Ma do wareyan de bê'

 

Yasemîne dîyar kerd ke înan dimayê qetilkerdişê Denîz Poyraze qerar dayo ke meclîsê xo awan bikerê û bi rêxistinkerde vejîyê meydanan. Sewbîna Yasemîne dîyar kerd ke heme cayê cuye de serê cinîyan de hêriş estê û semedê nê temamê serre meydanan de bi. Yasemîne wina vat: "Bi meclisê ke ma awan kerd ma do heme cinîyan binê banekî de kom bikerê. Ma do rêxistinê xo xurt bikerê û bi taybetî hemverê hêrişê serê cinîyan û bi pêroyî zî hemverê hêrişê serê komelî têkoşîn bikerê."

 

'Ma do qetî serbikewê' 

 

Yasemîne tewr peyîn wina vat: "Eke cinî pîya bi rêxistin bê, do bieşkê heme wareyê cuye de têduştîyê demokratîk bi ca bîyarê. La no zî tena bi hewldayîşêk alternatîf û paştdayîşî eşkeno bêro kerdene. Ma her roje ganî tewr zêde yewbînan ra hes bikerê û her cayî de rêxistinê xo bi hêz bikerê. Ma serdemê tewr nêzdî yê têduştî yê azadî de yê. Nê rê zî taybetî cinî û ciwanî pêşkêşî kenê. Ma do qetî serbikewê."