ENQERE - Parlamentera HDPyî Tulay Hatîmogullari hêrişê nîjadperestan yê ke hemverê Kurdan de yenê kerdiş ser o ercnayîş kerd û vat: "Nê hêrişî hemverê Kurdê ke xebitnayîşê ziwanê xo de israr kenê de ameyê kerdiş. Hêrişî hemverê paştdayîşê kurdan ê bi HDPyî dir ê û eynî wextî de hêrişêk hemverê HDPyî ke Tirkîya de wareyê averşîyayîşê sîyasî de rolêk pîl girewto serê xo, de yo."

 

Bajarokê Dereçîne yê Sultandagiya Afyonî de 19ê Temmuze de kedkarê ramitişî yê mewsîmî semedê ke Kurdkî qisey kerdibî, nîjadperestan hêrişê înan kerdibi û netîce de 2 ci ra cinî, 7 kesî birîndar bibî. Taxa Kavakli ya Altindaga Enqere de zî 20ê Temmuze de hêrişê keyeyêk Mêrdînijan amebi kerdene, 2 ci ra giran, 4 kesî birîndar bibî. Tewr peyîn zî qezaya Meramî ya Konyayî de taxa Çariklarî de keyayê taxe zî mîyan de 60 kesê nîjadperestî bi çek hêrişê keyeyê Amedijan kerdibi û netîce de Hakîm Dal (43) amebi kiştiş. Reaksîyonê hemverê nê hêrişê nîjadperestan her ke şino zêde beno.

 

Parlamentera Partîya Demokratîke ya Şaran (HDP) ya Edenî Tulay Hatîmogullari zî reaksîyon vera hêrişê nîjadperestan da.

 

'Hêrişî girêdayê yewbînan ê'

 

Tulaye bale nat serê serebûtê nîjadperestî û vat: "Tirkîya de demêk derg o rejîmê yew kesî dîktatorîyêk faşîst aver beno. Hedefê îqtîdarî yê 2023 oyo ke wazeno no dîktatorî bi rayîrê serekkomarî mende bikero. La yo ke hemverê dîktatorî vejêno zî HDP yo. Semedê nê zî Îzmîr de hêrişê HDPyî kerdî û Denîz Poyraz qetil kerdî. Hemverê qetilkerdişê Denîz Poyraze de heme hêzê demokrasî û muxalifan reaksîyonê hempar mojnayî. Coka dî ke hêrişê winasî de feyde nêgîrê. Nika muracatê metodêk bîn kenê. Bi hêrişê nîjadperestî yê hemverê kurdan ke wazenê sey serebûtî rêze bimojnê, reyna pey eynî provokasyonî yê. Wazena taybetî vajî ke çîyê ke yenê ciwîyayîş girêdayeyê yewbînan ê."

 

'Ganî provokasyonî veng bêrê vetiş'

 

Tulaye dewam de wina vat: "Nê hêrişî vera Kurdan ke qiseykerdişê bi ziwanê xo israr kenê yo û hemverê paştdayîşê kurdan ê bi HDPyî dir ê û eynî wextî de hêrişêk hemverê HDPyî ke Tirkîya de wareyê averşîyayîşê sîyasî de rolêk pîl girewto serê xo, de yo. Çira HDP rolêk pîl kay keno? Semedo ke ewro weçînayîş ci de HDP têkoşînê demokrasî de zî rolêko pîl kay keno. Têkoşînê hemverê dîktatorîyê faşîst ê bi zîhniyetê qeyûm têgêreno de, tewr zêde hemkarê HDP û hêzê tifaqî danê. HDPyo ke bi muxalefetî dir girêdayîşê xo xurt keno, wazenê ke meydanan de vengê ci bibirnê. Ma do hemverê nê provokasyonan de zî sere wedarnê û têkoşînê xo dewam bikerê."

 

'Ma rayîr nêdanê înan'

 

Tulaye tewr peyîn wina vat: "Înan waşt ke elewîyan zî qir bikerê. Semedo ke o ame îfşakerdene, na rey verê xo dayî HDPyê Îzmîrî û nika zî muracatê metodêk bîn kenê.  Belê ma pîya bedelê pîlî danê la ma do nê zî înan rê nêverdê. Semedo ke ma nê zîhnîyetê faşîst werte ra wedarnê û têduştîyê şaran awan bikerê ma do têkoşînê xo pîl bikerê."