Sema Çaglak

 

AMED - Havva Aksal 46 serrî debara xo bi dikanê sebze û fêkî kena. Havvaya ke eynî wextî de beşê Îlahiyatî yê Unîversîte wanena, wina vat: "Ganî cinî xo rolê hişmendîyê komelê serdestî yê camêrdan ra bixelisnê û rayîrê xo de şêrê. Wa cinî pey xeyalê xo şêrê."

 

Cinîyê ke rayberîya cuye kenê, her wareyê cuye de rengê xo mojnenê. Havva Aksal (46) ke Pîranê Amedî de ciwîyena û debara xo bi dikanê sebze û fêkîyan kena zî wareyê ekonomî de rengê xo mojnena. Havva ke 5 serrî nê karî kena, vana cinî bieşkê vajê ez eşkena û ez kena.

 

'Êdî karêk cinî nêkero çin o'

 

Havva destpêkê qiseykerdişê xo de bale ant serê karê xo û wina vat: "Mi û nacnîya xo waştêne karêk de bixebityê û ma nê cayî dî. Ma wina dest pêkerd. Destpêk de ma zaf baş nêbî. Ma tîcaret ra fam nêkerdêne. Semedo ke ma her wext keye de bî û ma serê karê ekonomî de nêvindertîbî. No het de ma tay xidarî dî. Le bi demî dir êdî ma zî fam kerd û ma xo aver berd. Êdî karêko ke cinî nêeşkena bikero çin o. Destpêk de hemverê karê mi de ewnîyayîşêk baş çinbi. Semedo ke karê dikanê sebze û fêkîyan her wext bi çimêk karê camêrdan o ameyo vînayîş. La bi wextî wextî dir êdî çimê înan zî karê mi musa."

 

'Bawerî û cesaretê mi bi mi esto' 

 

Havva serê zehmetîyê karê xo zî de vinderte û vat: "Ma hema zî karê xo de hîn zehmetîyan ancenê. Sey girewtişê sebzeyan yan zî karê teknîkî de zehmetî virazênê. La bawerî û cesaretê ma bi ma esto, ma do xo aver berê. Gama ke cinî semedê destpêkî game bierzo, vînena ke çiqas rayîr derbaz kerda. Ganî cinî bieşko vajo, ez eşkena bikerî û ez o bikerî. Xebata cinî bi rengê cinîyan weştir a."

 

'Wa cinî pey xeyalê xo de şêrê'

 

Havva tewr peyîn wina vat: "Mi tu wext nêwaşt ke zereyê keye de tena  roşî, firaq û cilan bişû. Ganî her tim na cuye de merdim cayê xo bigîro û pey cuyêke bi mana bo. Ez 46 serrî ya la wendekar a. Beno ke tay erey menda la mi waştişêk xo bi ca ard. Goreyê mi ganî heme cinî bicesaret bi û pey waştiş û xeyalê xo şêrê. Bi taybetî zî hetê wendiş û ekonomîyî xoser de ganî cinî her wext rayberî bikerê."