ENQERE - Keyeyê tepişteyê sîyasî Fatih Baranî ke surgunê Zîndanê  Tîpa T yê Ereglîyê Konya ameyo kerdene, ame dîyarkerdene ke nêzdîyê mengêke yo Fatih hucreyê yewkesî de yeno tepiştene û coka 12 rojî yo dest bi grevê vêşanîye kerdo û keyeyî vat, Fatîhî dîyar kerdo ke mudurê zîndanî înan meşgul keno û fek grevê vêşanîye ra vera nêdano.

 

Çalakîya grevê vêşanîye yê tepişteyê sîyasî ke hemverê tecrîdê serê Rayberê PKKyî Abdullah Ocalan û binpaykerdişê heqê zîndanan roja 245 de dewam keno. çalakgerê grevê vêşanîye Fatih Baran 25ê Hezîrane de 3in Zîndanê Tîpê T yê Tersûsî ra surgunê Zîndanê Tîpê T yê Eregliyê Konya ame kerdene. Fatiho ke bê zanayîşê keyeyê xo ame surgunkerdene, zîndan de hucreyê yewkesî de yeno tepiştene. Fatîho ke semedê hhucreyê yewkesî ra vejîyo xeylêk rey waştişname dayo û cewabêke pozîtîf nêgirewto coka 16ê Temmuze de dest bu çalakîya grevê vêşanîye kerd.

 

Roşan derbaz bi labelê Fatîh hema hucreyê yewkesî de yo 

 

Keyeyê Fatîhî dîyar kerd ke bi rayîrê pêvînayîşê bi telefonî dir ê musayê ke mudurê zîndanî vato eke Fatîh fek çalakî ra vera bido do hucreyê yewkesî ra vejîyo la Fatîhî no waştiş qebul nêkerdo. Dayîka Fatîhî, Miran Baran nê çî vat: "Pêwa ke roşan derbaz bi zî hema Fatîh hucreyê yewkesî de yeno tepiştene. Fatîhî mi ra vat: 'Heta ê mi nêdê verê embazanê mi, heta ez ê berî ra derbaz nêbî, ez o çalakîya grevê vêşanî dewam bikerî. Mudurê zîndanî ma tim meşgul keno. Coka ez bawerîya xo pê nêana."

 

'Na cezaya hucreyî çîya?'

 

Mirane wina dewam kerd: "Waştişê lajê mi oyo ke derbazê kîşte embazanê xo bibo. Wa nê nêheqî êdî lajê mi rê nêkerê. Lajê mi kesî rê zulm nêkerdo. Ê çira lajê mi rê zulm kenê? Ez fam nêkena na cezaya hucrî çîya? Eke lajê mi lajê înan bibayîne, do cîgere înan zî nêveşayîne? Bîlasebeb lajê mi eştê hucreyê yewkesî. Cîgera mi veşena. Wa ganî lajê mi hucre ra vejê û berêkîşte embazanê ey."

 

'Zîndan de nîjadperestî yeno kerdene'

 

Îbrahim Sutcu ke Zîndanê Tîpê T yê Ereglî de yeno tepiştene, dîyar kerd ke nîjadperestî teber de yeno kerdene û nika zîndanan de zî yeno kerdene û vat: "Semedo ke Fatîh bêro verê ma, ma waştişname da û ma  îdareyê zîndanî dir qisey kerd. Labelê demo ke îdare waştişê ma qebul nêkero, ma do zî dest bi çalakîya grevê vêşanîye bikerê."

 

Tepişteyê sîyasî hucreyê yewkesî de yenê tepiştene 

 

Tepişteyê sîyasî ke surgunê Zîndanê Tîpê T yê Ereglî yenê kerdene, bi muameleyê nêbaşî dir bi eynî metodî dir yenê rî bi rî. Bi muameleyê nêbaş, cigêrayîşê zitî dir rî bi rî manenê. Goreyê raporê ÎHDyî zî tepişteyê ke surgunê Zîndanê Ereglî yenê kerdene, demêk derg de hucreyê yew kesî de yenê verdayîş. Îdareyê zîndanî zî binpaykerdişê heqan, zîndan de sey ke normal bo ramojneno.

 

Goreyê raporê OHDyî serê esasê xeberê tepişteyan û keyeyan ameyo amadekerdene rewşa hîn tepişteyê ke zîndanê cîya yê Tirkîya ra surgunê Zîndanê Ereglî yenê kerdene wina yê:

 

*Omer Sipek, demê Zîndanê Çorumî ra yeno surgunkerdene Zîndanê Ereglî de serrêke û 6 mengî hucreyê yewkesî de yeno tepiştene.

 

*Faik Budak demo ke Zîndanê Tîpê M yê Ceyhanî ra surgunê Ereglî yeno kerdene, 2 sal û 6 mengî hucreyê yewkesî de yeno tepiştene.

 

*Îbrahim Sutcu demo ke 26ê Êlule 2019 de 2yîn Zîndanê Tîpê T yê Osmaniye ra surgunê Zîndanê Ereglî yeno kerdene 10 mengî hucre de yeno verdene, dima ra derbazê koxuşê normal kenê.

 

*Goreyê raporê avûkatan, tepişteyo bi nameyê Hasan Muhammet Îbiş ke 2yîn Zîndanê Tîpê T yê Osmanîye ra surgunê Zîndanê Ereglî yeno kerdene. Hasan Muhammet Îbiş dekewtişê zîndanî de bi şîdetêk giran dir rî bi rî maneno 8 mengî hucreyê yewkesî de tepişnenê.

 

*Dilxas Kiliçoglu demo ke Zîndanê  Tîpê F yê Wanî ra surgunê Zîndanê Ereglî yeno kerdene, 3 mengan hucreyê yewkesî de yeno verdayene.

 

*Omer Hayat, Îmam Buzi, Cudar Îcus, Mehmet Can 16ê teşrîna verêne 2020 de Zîndanê Kirşehirî ra surgunê Zîndanê Ereglî yeno kerdene, dekewtişê zîndanî de cigêrayîşê zitî serê ci de yeno ferzkerdene û nê 4 tepişteyî nêkenê koxuşe sîyasîyan, kenê koxuşêk blokêk cîya.

 

*Fatih Baran Zîndanê Tîpê T yê 3in ê Tersûsî ra 25ê Hezîrane de surgunê Zîndanê Ereglî yeno kerdene û o wextî ra heta nika hucreyê yewkesî de yeno tepiştene.