Gulîstan Azak

 

AMED - Pêwa hêrişê nîjadperest ke hemverê kurdan zêde benê, ziwanê hukmatî yê nefretî û nêdîyyaîşê hukmî zî nê hêrişan rê beno bingeh. Cinîyê ke reaksîyon vera hêrişan dayî, dîyar kerdî ke hêrişê Herêma Federal a Kurdistanî û Tirkîya bi yewîya neteweyî eşkenê bêrê astengkerdene. 

 

Şaristanê Tirkîya de hêrişê nîjadperest yê hemverê kurdan zêde benê. Dimayê qetilkerdişê Denîz Poyraz a ke bînaya Partîya Demokratîke ya Şaran (HDP) ya Îzmîrî de hêriş roj bi roje zêde bî û serê bînaya HDPyî ya Muglayî de zî hêriş ame kerdene. Dimayê nê hêrişê serê HDPyî de vna rey zî Konya, Enqere û Afyon de nîjadperestan hêrişê kurdan kerd û netîce de kesêk ame qetilkerdene û bi desan kesî birîndar bî.  

 

Sewbîna hêrişê dewleta tirkî Herêma Federal a Kurdistanî de zî dewam keno û bêvengîya PDKyî hemverê nê hêrişan zî beno sebebê reaksîyonê şarî. Partî, sazgeh û dezgehê kurdan zî dîyar kenê ke tena bi yewîya neteweyî eşkenê rayîr vernîya nê hêrişan bêro girewtene.

 

Cinîyan, hemverê hêrişê serê Kurdan de vengdayîşê yewbîyayîşî kerdî.

 

'Netîceyê tecrîdî Îmrali û yê serê şarî yo'

 

Parlamentera HDPyî ya Amedî Remzîye Tosun, dîyar kerd ke semedê kurdî nêbenê yew nê hêrişî yenê kerdene û vat: "Hêrişê hemverê kurdan roj bi roje zêde benê û dewam kenê. Bi nê hêrişan dir wazenê Kurdan çin bikerê. Qetilkerdişê Denîz Poyraz û hêrişê nîjadperst ke Konya de hemverê kurdan de ameyî kerdene, merdim nêeşkeno înan yewbînan rê cîya bigîro. Ziwanê sîyasetê yê hemverê komelê kurdî tesîr serê wareyan de zî keno. Wazenê ke kurdan bikerê hedefê hêrişan. Nê çîyê ke yenê ciwîyayîş, pêro netîceyê tecrîdê Îmraliyî û bi pêroyî serê komelî yo. Hemverê nê pêro caardişan tutê kurdan bi mengan o zîndanan de grevê vêşanîye de yê. Hemverê pêro nê hêrişan ma yewîya neteweyî xo rê bikerê qalxanê pawitişî."

 

'Hêrişî tena eşkenê bi yewîya neteweyî peynî bibê'

 

Hemsereka Komeleya Ziwan, Kultur û Hunerî ya Mezopotamyayî (MED -DER)  Şîlan Elmas Kan zî wina vat: "Heta ke kurdî bîyayîşê xo yê tarîxî; ziwanê xo nêpawê û tifaqê xo nêviraznê ê do herdem bibê hedefê hêrişan. Semedo ke kurdî nêbîyê yew, temamê tarîxî de bîyê hedefê hêrişan, ameyê qetilkerdene û nêbîyê wayîrê statuyêk. Semedê nê zî ancax nê hêrişî bi yewbîyayîş merdim eşkeno peynî bikero. Yewîya neteweyî mecbûrî ya û ganî cinîyê kurdî nê rê rayberî bikerê."

 

'Kurdî eşkenê cewabêk xurt bidê nê hêrişan'

 

Mamosteya Ziwanê Kurdkî Remzîye Onel zî vat ke bi serran o lazimîyê kurdan bi yewbîyayîş esto û vat: "Hemverê hêrişan rayîrêk tena esto û o zî yewbîyayîş o. Heta ke kurdî bîyayîşê xo îspat nêkerê, do êdî nêeşkê serê herra xo de biciwîyê. Semedê safîkerdişê problemî yewîye lazim a. Wexto ke kurdî xo bikerê yew, do hêrişê serê înan zî peynî bibê. Ganî kurdî hemverê hêrişan hêzê xo bikerê yew û hemverê nê hêrişan xo ver bidê."