STENBOL- OHD, ÎHD, TÎHV û TOHAVî seba ke qerarê binpaykerdişê heqan ê derheqê "Zîndanê heta hetayî yê giran" ê seba Ocalan, Kaytan, Gurban û Boltan ameyê dayene, bi lezabez bikerê rojeva xo, muracatê Komîteya Wezîran a Konseya Ewropa kerdî.

 

Goreyê Ajansê Xeberan ê Mezopotamya (MA) Komeleya Huqûqnasan a Seba Azadîye (OHD), Komeleya Heqanê Merdiman (ÎHD), Weqfa Heqanê Merdiman a Tirkîya (TÎHV) û Weqfa Cigêrayîşanê Huqûq û Komelî (TOHAV) muracatê komîte kerd.

 

Komîteya Wezîran a Konseya Ewropa (KWKE) seba ke kontrolê caardişê biranê Mehkemeya Heqanê Merdiman a Ewropa (MHME) ra wezîfedar û mesuldar a muracat Konseya Ewropa (KE) ra ame kerdene. Muracat de ame vatene ke cezaya muebede ya ke Ocalanî rê dîyaye dûştê krîteranê Peymana Heqanê Merdiman a Ewropa (PHME) ya. Dezgehan vist vîrî ke Komîteya Wezîran heta nika na bire nêarde rojdemê xo.

 

Muracat de ame parekerdene ke cezaya muebede cezayêka sîyasî ya.

 

Muracat de nê tesbîtî ameyî kerdene:

 

"*Tedbîranê Planê Çalakîye yê Hukmatî yê 2015î de çareserîye ra, wedarnayîşê qedexeyê veradayîşê bişertî ra, tedbîranê vera binpaykerdişanê heqan ra dûr ê.

 

*Rixmo ke derheqê Ocalan, Kaytan, Guran û Boltanî de cezaya muebede dîyaye Komîteya Wezîrane babete nêarde rojdem.

 

*Xîretê hukmatî yê seba wedarnayîşê cezaya muebede çin o û pêşnîyazê partîyan ê sîyasîyan zî nênê ercnayene.

 

*Vurnayîşê madeya 89. ya Qanûnê Înfazî û Qanûnê 7242. wedarnayîşê muebede armanc nêkenê. Ganî biinpaykerdişê vera tepişteyan, krîterê ercnayîşanê şertanê zîndanî bêrê nîqaşkerdene.

 

*Mehkemeya Qanûnê Bingeyî (MQB) zî derheqê heqê hêvîye de mesele esasî ra nêkerde rojdem. MQB semedo ke MHME vera Tirkîya birê binpaykerdişî dayî cigêrayîşê mesele ra dûrî vindeno. Eke MQB û MHME heman biran bidê weçînayîşê qanûnî do bêrê kerdene.

 

*Ganî bi hawayêkê qetî Tirkîya ra tabloyê cezayan ê muebedan bêro waştene û rewşe bêra eşkerakerdene.

 

*Ganî Komîte babeta binpaykerdişanê heqanê Ocalan (2), Gûrban, Kaytan û Boltanî bigêra rojdemê xo. Temsîlkarê Komîte zî ganî babeta muracatî bivisnê rojdemê xo û mesele teqîb bikerê.

 

*Ganî Tirkîya ra Planê Çalakîye yo newe bêro waştene, pê nê planê zî bêro waştene ke tedbîrê şexsî û pêroyî bêrê pêşkêşkerdene.

 

*Tirkîya ra wa derheqê cezaya muebede de agahîye bêra waştene.

 

*Wa komîte bikera ke Huqûqê Tirkîya bê cîyakerîye heqê veradîyayîşê bişertî pêşkêşê pêro tepişteyan bikero."