Sevim Sutcu

 

ENQERE - Marya Înal ke demê qedexeyê tebervejîyayîşê kuçeyan ê Geverî de koçê Enqere kerd, bi  îmkananê xo "Keyeyê Tenûre yê Wanî" akerd û xo ver da. Marya dîyar kerd ke se beno wa bibo aye Enqere de nanê tenûre vistêne ta û wina vat: "Bi 30 serrî yo ez nê karî kena û bawerîya mi bi mi esta. Ez o 'Keyeyê Tenûre yê Wanî' bi dinya bidî naskerdiş."

 

Serdemê pêrodayîş û qedexeyê vakurî yê 2015 û 2016 de serê welatijan de koçberî ame ferzkerdiş. Bi hezaran welatî semedê teda mecbûr mendî ke şaristanê xo terk bikerê. Nê welatijan ra yewe zî Marya Înal a. Marya Gever ra koçê Enqere kerd û aye "Keyeyê Tenûre ya Wanî" akerd û hewl dana ke serê linganê xo de vindero.

 

'Ma serê înternetî de dî ke keyeyê ma veşa'

 

Marya Înal (50), prosesê 2015ine de semedê pêrodayîşê giranî, herême ra yena verê merdimanê xo yê Enqereyî. Marya wina qal kerd: "Demo ke Gever de 2015 de qedexeyî ameyî destpêkerdiş, ma zaf zehmetî dî ke ma xo biresnê werd. Ez bi 6 tutan keye de mecbûr ameya verdayîş ke vêşan bimanî. Bi qedexeyan ma 3 mengî keye de tepişte mendî. Demo ke qedexe ame îlankerdiş qeymeqam vat, şêrê şaristanê bînan. Demê pêrodayîşan de her kes mecbûr mend şêro cayêk bîn. Xeylêk keyeyî şî ser şaristanê Stenbol, Enqere, Îzmîr û yê ke qet nêzanayîne. Ma zî ameyî verê merdimanê xo yê Enqereyî. Ma serê înternetî de dî ke keyeyê ma veşayo. Tena keyeyê ma ney, keyeyê a herême heme ameyî veşnayîş. Demo ke ma ameyî Enqere tutê mi zî xeylêk zehmetî dî. Tutê mi nê heq nêkerdêne."

 

'Ez xo hêzdar vînena'

 

Marya vat, aye KOSGEB ra sertîfîka girewta û Colemêrg de zî dayîka xo ra esnafî musaya û vat: "Ez şîya qurs û mi sertîfîka girewt. Ez karê xo ra hes kena. Ez xo hêzdar vînena. Mi nê dikanî akerd û nika 6 personelê ke bi sigorta bixebityê estê. Ez wazena ke 'Keyeyê Tenûrê yê Wanî' bi dinya bidî naskerdiş. Tena Enqere ra ney, şaristanê cîya ra zî muşterîyê mi estê. La vernîya pandemî de karê mi hîn abaş bi. Ma zaf zor da ke dikan nêro padayîş. Serê waştişan ma wazenê ke şaristanê cîya de şubeyê xo abikerê."