Medya Uren

 

MÊRDÎN  - Turkan Duruç ke yew dayîkê yewin ê aştîye ya, qalê naskerdişê xo yê rêxistinî û Dayîkê Aştîye kerd. Turkane dîyar kerd ke ganî aye sey cinî her wext vernê de bê û wina vat: "Sey cinî tewr zêde bar keweno serê milê ma ke ma hemverê pêro bindestîyan sere wedarnê. Heta ma bieşkê helm bigîrê ma do nê serewedaritişê xo berê sere."

 

Turkan Duruç ke yew dayîkê yewin ê Aştîye ya cuya xo ma rê qal kena û dîyar kena ke aye semedê aştîya pêro komelan xo ver bida. Turkane ke bi serran mîyanê partîya sîyasî de ca girewte, destpêk de mîyanê baskê cinîyan de û dima ra zî Meclîsê Dayîkê Aştîye de ca girewte. Heta nika pêwa pêro tedayan aye xo ver dana.

 

Hemverê nîjadperestî û cinsperestî bî 

 

Turkan  Duruç serra 1959 de dewa Xerbê Nasê ya girêdayê qezaya Mîdyadê Mêrdînî de yena dinya. Mîyanê keyeyêk kedkar de pîl bena. 14 serrîya xo de zewicêna. Kesê ci dir zewicêna zî bêdadîye û bêbabî mîyanê çinbîyayîşî de pîl bîyo. 16 serrîya xo de tutê xo yê yewin ana dinya û bena dayîka 6 tutan. Semedê nê karî û çinbîyayîşî, koçberê Mîdyadî benê. Mîdyad ra zî şinê Riha û ûca ra zî agêrênê Mêrdîn. Turkane vernîya ke bêro  Mêrdîn, rêxistine nas kena û gama ke ûca de bi ca bena zî partîya sîyasî ya ê wextî Partîya Kede ya Şarî (HEP) de cayê xo gêna. Bi taybetî zî wareyê cinîyan de ca gêna û dimayê Meclîsê Dayîkê Aştîye Mêrdîn de yeno awankerdiş zî aye bena dayîka yewin a meclîsî. A roje ra heta nika hemverê nîjadperestî û hemverê cinsperestî serewedaritişê xo dewam kena.

 

'Azadîya cinîyan azadîya komelî ya'

 

Turkane dimayê ke Mêrdîn de bi ca  bena, semedê xo rayîrêk serewedaritişî vînena û mîyanê sîyasetê kurdî de ca gêna. Turkane wina qalê nê prosesî kena: "Mi na rey tu camêrdêk nêkerd rayîrê xelasî. Mi rêxistin û partîya ma ya sîyasî sey rayîro rast dî û mi mîyan de ca girewt. No semedê mi serewedaritişêk û azadîyêk bi. Ma çend heta nika azad nêbibî zî ma do vajê ma bi eşqê heskerdişî merdî û ma semedê nê têkoşîn kerd. Mi bi taybetî xebatê cinîyan kerd. Semedo ke amancê mi sere de azadîya cinîyan bî. Semedo ke heta cinî azad nêbo, komel zî azad nêbeno. Dimayê ke Meclîsê Dayikê Aştîye ame awankerdiş zî mi semedê ûca xo pêşnîyaz kerd. Semedo ke lazimîyê mi zî no yo."

 

'Heta peynî ma do têkoşîn bikerê'

 

Turkane bale ant serê tehdîd û hêrişê ke serê înan de yenê kerdiş û vat: "Ma Dayîkê Aştîye yê. Semedo ke ma aştî waşt, hêrişê ma kenê. Mi HEPî de ca girewt. Heta nika bi desan partîyê ma ameyî padayîş. Kes nêeşkeno kurdan bêveng bikero. Ne ters ne zî hêrişî bi ma eşkenê. Ma merdimê aştîwaşte yê.  Yê hemverê ma xo eşkera kenê û rîyê xo ramojnenê. Heta ke ma biciwîyê ma do têkoşînê xo dewam bikerê."