Derya Ren

 

RIHA - Dewa Teyştî de welatijan dîyar kerd ke Kasim Gulpinar û merdimê ci dest dayî serê erdê înan û vatî: "No çîyo ke yeno kerdiş zulm o. Wazenê ma êdî êdî dewe ra bierzê. Erdî malê xezîneyê û yenê serê nameyê xo de, merdimanê xo de tapû kenê."

 

Ame îdiakerdiş ke dewa Teyştî ya Siwêregî de Parlamenterê AKPyî Kasim Gulpinar û merdimê ci dest danê serê erdê welatijan û tapû serê nameyê xo de kenê. Ame dîyarkerdiş ke Kasim Gulpinar û merdimê ci 7ê Tebaxe de bi cendermeyan, kepçe, traqtor û wesayîtan dest dayî serê erdê welatijan. Seba nê dewijî şîyê verê cendermeyan la înan zî vato, 'çîyêk destê ma ra nîno.'

 

Derheqê babete de dewijan ajansê ma rê qisey kerd.

 

'Wazenê ma dewe ra bierzê'

 

Hizna Gumuş, dîyar kerd ke aye bi serran o dewa Teyştî de ronişnena û citkarî kena û vat bi şertê zor de dewe awan kerdê la Parlamenterê AKPyî Kasim Gulpinar bi hîleyan sey xeylêk dewan erdê dewa Teyştî zî berdo serê nameyê xo. Semedo ke parlamenterê AKPyî yo, dewlete paşte înan de ya ma nêeşkenê çîyêk bikerê. Bi seyan serre yo ma serê na herre de xebityenê. Çend rojî verê bi kepçe, wesayît û bi hezaran însanan dest dayî serê herra ma. Wazenê ma dewe ra bierzê. Erdê ke nêeşkeno bigîro serê nameyê xo, serê nameyê waye û birayê xo de qeyd keno. Malê xezîneyî serê nameyê xo û nameyê merdimanê xo de tapû keno."

 

'Dest dayî serê erdê ma' 

 

Zelîha Alan, dîyar kerd ke bi leşkeran ameyê û dest dayê serê erdî û vat: "Ma di rey herra xo girewt la tapû nêdayî ma. Semedê nê zî Kasim Gulpinar û merdimê ci reyke bîn ameyî û dest dayî serê erdê ma. Nika serê erdê ma de bi seyan makîne estê. Nê makîneyan bajaranê derûdorî ra ardî. Ma şinê gerre kenê la seba ke parlamenterê AKPyî yo çîyêk nîno kerdiş. Ma nêzanê ma do se bikerê."

 

'Ma bî Filîstînîjî...'

 

Nusret Karataş zî wina vat: "Rewşa ma ya ekonomî baş nîya, semedê nê zî ma bi tûtanê xo dir şinê Îzmîr û ûca de xebityenê. Ma nêwazenê bibê karkerê mewsîmî. 4 rojî verê nêzdîyê 100 kepçe û bi seyan makîne ameyî. Hêza ma çin o ke m avera înan de vinderê. Herra ma ameya îşxalkerdiş. Ma nika bîyê Filîstînij û ê zî bîyê Îsraîlij. No çî zulm û heqaret o. Ma şinê gerre kenê labelê dewlete zî û avûkatî zî înan ra yê. Leşkerêk înan dir amebi, mi cira vat ey zî vat, 'wezîfeyê ma çin o.' Ez o nika se bikerî. Herre ya ma ya la tapû serê nameyê xo de viraştê. Semedo ke ma serê na herre de xebityenê, dewlete paştdayîş dayîne ma."

 

'Çîyo ke ma bikerê çin o'

 

Salîh Alan zî eynî dewe de ciwîyeno û wina bale ant serê mexduriyetê ke ciwîyenê: "Bi zor ma dewe ra vejenê. Sebebê pêro probleman, Kasim Gulpinar û birayê ci Veysel Gulpinar o."

 

Şeyhmus Yol zî vat, 10 donim erdê îna esto û wina dewam kerd: "10 donim erdê mi esto la ma 15 kesî yê. Nika wazenê erdê ma, ma ra bigîrê. Bi sextekarî erdê ma ma ra girewtî. Heme wesayîtan de çek estbi. Dewlete destê înan de ya û çîyo ke ma nika bikerê çin o."