KONYA - Hemsereka HDPyî ya Konyayî Songul Çetin bale ant serê hêrişê nîjadperestî yê ke zêde benê û vat: "Dewlete bi dişminîya hemverê kurdan, xo serê lingan de vindarnena. Ma sey HDPyî mecbûr ê hemverê nê xebatê cidî bikerê. Ganî nê hêrîşê nêbê sebebê tersî. Ganî hîna bi hêz bê û bikewê meydanan."

 

Menga peyîn de 4 ci ra cinî 8 kurdî bi hêrişê nîjadperestî ameyî qetilkerdiş û xeylêk kurdî birîndar bî. Afyon û Antalya de nîjadperestan karkerê mewsîmî yê kurdan kuwayî û Enqere de zî 4 kurdî bi çek giranî ameyî birîndarkerdiş. Reyna Enqere de cinîyêke kurd û tûtî semedê hêrişê nîjadperest mecbûr mendî koç kerdî. Hêrişê serê kurdan yê nîjadperestî sewîyeya nîjadperestî verê çiman de rafîneno.

 

Hemsereka Partîya Demokratîke ya Şaran (HDP) a Konyayî Songul Çetîn derheqê hêrişê nîjadperestî yê zêde benê ercnayîş kerdî.

 

Songule dîyar kerd ke babeta hêrişê nîjadperestî babetêka kûr a û wina vat: "Hêrişê serê keyeyê Dedeogullari munferit nîyê. No demêk derg o nê hêrişî yenê kerdiş. Sebebê nê hêrişan eynî wextî de ziwanê hukmatî yo. Bi nê hêrişê zî kurd û tirkan kenê di perçe. Adirê ke bi daristanê Antalya, Îzmir, Manîsa û Ispartayî kewt, kerdê milê kurdan. Bi nê wazenê şarî bidê tersnayîş. No bi zanayîş yeno kerdiş. Ma her wext şinê serdayîşê keyeyê ke ame qetilkerdiş. Vanê kiştoxî ameyî tepiştiş, labelê ma reyna zî bi endîşeyîn ê. Ma bîyê hedef. Ma vanê gelo beno ke hîn kesî bêrê û ma qetil bikerê."

 

'Dewlete bi dişminayî hemverê kurdan de xo serê lingan de verdena' 

 

Songule dîyar kerd ke mîyanê sîstemî de dişminîyêk cidî hemverê kurdan de esto û vat: "Dewlete bi dişminayî hemverê kurdan xo serê lingan de verdena. Ma sey HDPyijî mecbûr ê ke vera nê xebatanê cidî bikerê. Zîhnîyetê AKP-MHPyî sey  turk-sunî wazenê kesê ke sey înan nêfikrîyenê, înan asîmîle bikerê. Tena tirkîya eşkena pawitişê heq, bawerî, ercnayîşê pêro şaranê xo xelas bikero. Ganî qanûnêko newe amade bikero û vajo, 'Ma rayîrê rast de nêşinê, rayîro rast rayîro demokratîk, adîl, aştî yo."

 

'Ganî ma nêtersê ma bikewê meydanan'

 

Songule tewr peyîn wina vat: "Roj roja tersî nîya. Kurdî nika hêzê lokomotîf ê Tirkîya yê. Eke kurdî nêbê, kes nêeşkeno bêro îqtidar, kes nêeşkeno serbikewo, Tirkîya nêeşkena azad bibo. Dewlete bi hêzê ma zana. Ganî ma zî nê hêzê xo baş bixebitnê. Ganî ma nêtersê bikewê meydanan."