ÎZMÎR - Zîndanê Şakranî ke bi teda û zulm her wext rojeve de yo û Cîhan Oner ke Zîndanê Şakranî de tepişte yo, dîyar kerd ke Şakran sey zîndanêk pîlot ameyo weçînayîş û vat: "Ma hemverê faşîzmî xo ver danê. La ma veng danê rayaumumî ke derheqê Zîndanê Şakranî de hîsgêr û bi dîqet bê."

 

Binpaykerdişê heqê tepişteyan hema zî rojeva sereyîn o. Tepişteyê ke waştî bi grevê vêşanî bale bi ancê serê binpaykerdişê heqanê xo û tecrîdê hemverê Rayberê PKKyî Abdullah Ocalanî. Tepişteyê herême û Tirkîya hemverê teda û zulmî 260 rojî yo xo ver danê. Zîndanê Şakranî de bi teda û zulmî her roj rojeve de yo. Cîhan Oner serra 2010 de Colemêrg de ame tepiştiş, waşt bi kurdkî pawitişê xo bikero. La pawitişê ey bi kurdkî ame astengkerdiş û ey nêeşka pawitişê xo bikero. Cîhan cezaya muebetî girewt. Cîhan nika Zîndanê Şakranî de yo. Cîhanî derheqê rewşa Zîndanê Şakranî û binpaykerdişê heqê tepişteyan de mektubêk şawit.

 

Bîyê dişminê Kurdan... 

 

Cîhanî mektubê xo de wina vat: "Bi ameyîşê Mudûrê yewin ê Zîndanê Şakranî Meltem Babaogluyî  binpaykerdişê heqan vejîyayo sewîyeya tewr cor. Zîndanê Şakranî sey herêmeke pîlot ameyo weçînayîş. Zîndan de hemverê kurdan de dişminîyêk esto û hemverê kurdan sond ameyo wendiş. Meltem Babaoglu bîya dişminê kurd û şorişgeran. Bi mûameleyê rûmet şikinayîşî û hewldayîşê qijvistişê şexsî hêrişê nasnameyê ma yê sîyasî kena. Melteme 3 serrî yo tîya ya û mîyanê 3 serran de tewr zêde heqê ma ame binpaykerdiş. Qerarê dadgehe zî semedê aye derbazdar nîyê. Goreyê şexsê xo rêzikan pratîze kena. Tîya de mekanîzmayê ke Meltem Babaoglu taqîb bikero çin o. Dezgehê sey Dadgeha Cezaya Giran ya Karşiyaka û Dadgeha Înfazî ya Karşiyakayî zî bi hewldayîşê xo paştdayîş danê Melteme."

 

Qanûnê poşmanî tepişteyan rê yeno ferzkerdiş

 

1ê çeleyê 2021 de Qanûnê Înfazî de sererastkerdişêk ame kerdiş. Çarçewaya vurnayîşî de 'Sîstemê Rewşa Baş' sey 'Qanûnê Poşmanî' yeno pratîzekerdiş. Ganî ti poşman bibê û şêrê koxuşê xoser, dima ra yenê tehlîyekerdiş. No çî tepişteyan rê yeno ferzkerdiş. Tehlîyeyê 5 embazanê ma amebi la semedo ke qanûnê poşmanî qebûl nêkerdî, nêameyî tehliyekerdiş. No çî hemverê qanûnî yo û înfazê ma hemûyan werte ra wedarnenê. Bi nê qanûnî, 'Konseptê zorberdişî' zîndanan de dewam kenê. La ganî bêro zanayîş ke ma qet hemverê nê çîyan de sere nêtewênenê û heta peynî ma do xo ver bidê.

 

Muracatê ma bênetîce manenê

 

Mesîl Demîralp û Rahşan Aydin cezaya giran ya muebetî girewtê û Zîndanê Cinîyan Şakranî de yê. Her di embazê ma hucreyê yewkesî de manenê û bi şîdetê psîkolojî de rî bi rî manenê. Her tim bi cezaya pêvînayîşê mabêne hucreyan û astengkerdişê pêvînayîşî dir rî bi rî manenê. Hemverê nê xeylêk rey  muracatê sazgeh û dezgehan kerdê la heta nika çîyêk nêame kerdiş û  şert û mercê embazanê ma nêame vurnayîş. Ma rewşa înan ya psîkolojîk û asayîşê rê bi endîşeyîn ê. Sewbîna heqê ma yê mektuban ê mabêne hucreyan de zî yeno îhlalkerdiş.

 

Pandemî kerdî bahane

 

Bi pandemî dir tewr zêde hewldayîşê kêyfî ameyî kerdiş. Îdarekarê zîndanî pandemî kerd bahane û pêropêvînayîşê ma asteng kerd. La 10 rojan ra reyke koxuşê karantînayî zî tede heme koxuşan cigêrayîş yeno kerdiş. Koxuşê ma yenê talankerdiş.

 

Yewtîpbîyayîş yeno ferzkerdiş 

 

Cilê ke bi arlonî ameyî viraştiş, solê bi layî, poşetê naylonî ameyî qedexekerdiş. Xeylêk cil û belgî bi bahaneyê rengî nînê dayîş. zîndan de çend yewtîpbîyayîş qanûn nêbo zî tepişteyan rê yeno ferzkerdiş.

 

Weşanên Kurdkî tîya qedexeyê

 

Sewbîna bi ameyîşê Meltem Babaoglu dir kitabê bi kurdî zî ameyî qedexekerdiş. 3 serrî yo bi bahaneyê ke tercûman çin o, weşanê bi kurdkî nînê dayîş. Labelê zîndan de nîme ra zêdeyêr xebatkarî kurd ê. Îzmîr de xeylêk  kurdî ciwîyenê. Dadgehê Îzmîrî de tercûman estê û no çî bi qanûn ameyo ferzkerdiş. Goreyê madeyê 62yîn ê qanûnê 5275î bi bahaneyê zirar dano asayîş û mustehcen o weşanî nînê dayîş. Nê çî yenê manaya krimînalîzekerdişê ziwanê dayîke. Çend embazê ma derheqê nêdayîşê kitabê bi kurdkî muracatê Dadgeha 1in ê Cezaya Giran dabî û muracat amebi qebûlkerdiş. La îdarekarê zîndanî hemverê qerarê dadgehe vejîya. Kitabê bi îngilizî û almanî yenê dayîş la kurdkî nînê dayîş. No çî  nîşaneyê dewamkerdişê dişminîyê  kurdan o.

 

Gardîyanê faşîst û hewldayîşê provakatîf 

 

Şakran de her wext şîdetê psîkolojîk yeno kerdiş. Gardiyanê faşîstî bi bahaneyê cîya wazenê provokasyonan vejê. Dest danê serê mektubê ke ma rewşa xo qal kenê û hewl danê ke bişawê heyetê mîyannetewî. Goş nêdanê waştişnameyê ma. Hewl danê ke çîyê ke tîya yenê ciwîyayîş, kes xeberdar nêbo.

 

Ma do hemverê faşîzmî xoverdayîşê xo dewam bikerê. La ma veng danê rayaumumî ke derheqê Zîndanê Şakranî de hîsgêr û bi dîqet bê.