Medya Uren 

 

AMED - Hemsereka Pêroyî ya DBPyî Salîha Aydenîz derheqê kongreya asayî ya 6in a DBPyî de wina vat: "Hemverê qirkerdişê siyasetê kurdî û hemverê heme tewir  nîjadperestîyê Tirkîya yê hemverê kurdan yenê kerdiş, ma do bi rêxistinbîyayîşêk pîl vejîyê hemverê înan. Ma do bi rêxistinê xo tecrîd, faşîzm birijnê."

 

Partîya Herêmê Demokratîk (DBP) bi sloganê "Bi Komeleyê Rêxistinkerde, Ver Bi Cuya Azade" 6in Kongreya xo ya asayî 27ê Sibate de Anqara de bikero. Hemsereka DBPyî ya pêroyî parlamentere Salîha Aydenîz derheqê xebatê kongreye û amancê kongre ser o ajansê ma rê qisey kerd.

 

'Ma torra xo tewr pîl kerd'

 

Salîha destpêkê qiseykerdişê xo de bale ant serê xebatê DBPyî yê demê verî û wina vat: "Yeno zanayîş ke serrê 2015î ra dima hêrişê hemverê partîyê sîyasî yê kurdan, sazgeh û dezgehê seba ziwan û kulturê kurdî xizmet kenê, sewbîna do serê pêkerdişan her ke şi hêrişî zêde bî. Seba şert û mercê sîyasî û rewşa welat ê wextî de qerar ame girewtiş ke DBP 4 bajaran de xo rêxistin bikero. Bi qasî 4 serran zî serê nê bajaran de rêxistin ame kerdiş. Kongreya asayî ya 5in ke serra 2019in de ame kerdiş de zî ma qerar girewt ke ma rêxistinbîyayîşê xo hîra bikerê. Ma her ca de herêma Kurdistanî de xebatê xo dayî destpêkerdiş. A çarçewa de zî dewe, qeza, bajar û heme taxan ma xo resna welatijan. Eslê xo de zî amancê ma o bi ke hemverê hende hêriş û polîtîkayê dişminî ma torra xo ya komelî pîl bikerê û têkoşînê xo pîl bikerê bi. Ma pîyayîşê xo bi nê wesîle da dewamkerdiş."

 

'Ma do hemverê qirkerdişî bi rêxistinbîyayîşêk xurt vejîyê vernîya şarî'

 

Salîha dewam de wina vat: "Her çiqas hêriş, tehdîd, muhakemekerdiş û operesyonî bibê zî, çiqas polîtîkayê tecrîd, qeyûm, polîtîkayê şerî bêrê kerdiş zî hemverê nê de têkoşînêk girs esto. Seba ke ma bibê cewab zî lazimîyê ma bi rêxistinbîyayîş esto. Ma seba nê zî kongreya 6in kerd rojeve. Ma bi hêz û bawerî zî kongreya xo bikerê. Pey kongre ma do Kurdistan û Tirkîya bi Kurdistanijan dir rêxistinbîyayîşê xo tewr xurt bikerê. Ma do hemverê qirkerdişî bi rêxistinbîyayîşêk xurt vejîyê vernîya şarî." 

 

'Ma do xo biresnê her kesî'

 

Salîha wina qalê xebate kerd: "Sîstemê îşxalkerde ke wazeno faşîzmê xo biresno qil, gamanê xo bi qirkerdişê kurdan dir erzeno. Xora  komara Tirkîya zî serê bingehê yew  destî û nîjadperestî xo awan kena. Na seserre de ziwan û kulturê bi milyonan kurdan çin hesibnena.  Ma zî vera nê sey Herêmê Demokratîk gama xo ya yewin bi kongreya 6in dir erzenê. Ma kuçeyan, dewan û her ca de xebate xo dewam bikerê. Tena vatiş û perwerde de ney, ma do teorîyê xo pratîk de zî ramojnê. Bêguman yewin kerdişê ma zî do yewîye û temsîlîyê hempar bo."

 

'Ma do tewr bi hêz agêrê wareyan'

 

Saliha vatişê xo wina qedêna: "Yeno zanayîş ke Tirkîya mîyanê krîzê pîl de menda. Sebebê nê zî şer polîtîkayê taybet û tecrîdê yeno kerdiş o. Tecrîdo ke şexsê Birêz Abdullah Ocalanî de serê heme şarê kurdî û şaran de yeno kerdiş, bêmabên dewam keno. Ganî no îqtîdar bêro rijnayîş. Çiqas têkoşîn û yewîye bi ca bêro, do rijnayîşî îqtidarî û şiknayîşê tecrîdî zî asan bibo. Ma do bi na hêvî, hîs û hewildayîşê pîlî xebatê xo reyke bîn bidê destpêkerdiş. Ma do bi hazirtî û hêzêk pîl wareyan de bê. Bêguman zî netîceyê nê zî baş bi. Şansêk ma yê bîn çin o."