AMED - Seba vatişê 'Kurdistanî' ke Hemsereka KCDyî Leyla Guvene ardo ziwan ke Serdozgerîya Komare ya Çewlîgî derheqê Leyla de cipersayîş dabî destpêkerdiş.  Ame dîyarkerdiş ke cipersayîş peynî bîyo û qerarê dewanêakerdişî ameyo dayîş.  

 

Hemsereka Kongreya Komeleya Demokratîke (KCD) Leyla Guven ke Zîndanê Cinîyan ê Xarpêtî de yena tepiştişî, 20ê Teşrîna Peyîne ya 2020î de beşdarê bernameyêke ganî ya Çewlîgî de bîbî. Ame zanayene ke Serdozgerîya Komare ya Çewlîgî zî bi behaneyê bikarardişê çekuya 'Kurdistanî' derheqê Leyla de cipersayîş dayo destpêkerdiş. 

 

Bernameyî de Leyla wina vana: "Ez ameya Çewlîg.  Siba zî civatê ma şarî dir esto. E, no civatê ma yo ke şarî dir o, bi rojan dewam keno. Sewbîna Kurdistan de ma xeylêk xebatan kenê, şarî dir civatan kenê. Ma,  seba ke silamêke bidê  Şarê Çewlîgî ameyê tîya." 

 

Coka nê vatişanê Leyla, Serdozgerîye bi îdîayê 'Propagandayê rêxistine kerdo' cipersayîş dabî destpêkerdiş û Leyla îfadeyê xo daybî. Îfadeyê xo de; Leyla îşaret kerd ke çekûya 'Kurdistanî' mehnaya 'Mintiqayî' de ardo ziwan. 

 

Serdozgerîye cipersayîşê xo qedêna û eşkera kerd ke çekûya 'Kurdistanî' verê sûcî yê 'Propagandayê rêxistine' nêkeweno û qerarê dewanêakerdişî da.