ANQARA - Vervatoxa HDPyî Ebru Gunay vat: “Raporê Îmraliyî raporê huqûq û demokrasî yê Îmraliyî yo. Qetî tecrîd bêro wedaritene.”

 

Vervatoxa Partîya Demokratîke ya Şaran (HDP) Ebru Gunay merkezê partîya xo de kombîyayîşê çapemenîye kerd û rojdem ercna. 

 

Qiseykerdişê hewteyî de wina qisey kerd:

 

“Şerê Ukrayna şerê hegemonya yê NATO û Rûsya yo. No şer xirabîye ra ber çîyêk nêdano şarî. Ganî bi muzakere, metodanê dîplomatîkan, dîyalog û metodanê haştîye mesele bêra çareserkerdene. Polîtîkayê şerî vera haştîya dinya gefêko pîl o. Ganî Neteweyê Yewbîyayeyî û OSCE bikewê dewre. Ganî perspektîfê çareserîye goreyê îdareyê şaran bibo. Ma venga NYyî danê ke seba şerê Ukrayna adirbirnayîş îlan bikero û tedbîranê hewceyan bigêro.

 

Polîtîkayê şerî bi tecrîdê Îmraliyî eleqedar ê. Tecrîd de israr şer de israr o. Avûkatanê Ocalanî Raporê Îmraliyî eşkera kerd. Goreyê raporî 2021 de keyeyan 71 reyî muracatê pêvînayîşî kerdî û muracatî ameyî redkerdene. Avûkatan 202 reyî muracatî kerdî, nê zî ameyî redkerdene. Birêz Ocalanî tim dîyar kerd ke o terefgîrê haştîye, çareserîya demokratîke yo. Haştîya ke o wazeno awan bikero, do verê Tirkîyaya demokratîke abikera û Rojhelatê Mîyanênî asayî bikera. Coka ganî tecrîd wa bêro wedaritene.

 

Şar mîyanê pêro şertan de zî wayîrê HDP û têkoşînî vejîyeno. Şarê Tirkîya tim pare kenê ke HDP yeno manaya hêvî û çêrîye. Pêro beşê komelî fam kenê ke HDP bîyo mefteyê ameyoxî. HDP eşkeno meseleyanê seserreyan çareser bikero. Ma do reyna vajê ke vera şerê hegemonya yê hêzanê globalan tek serwer îradeyê şaran o.”