ANQARA - Tepişteyê edlî yê zîndanê Baybûrtî de, heqaretê giran û nengan serê pateyê sipeyî de nusenê û erzenê hetê tepişteyê cinî yê siyasî. Her çiqas muracatê îdarekarîyê zîndanî ameyo kerdiş zî heta nika  tu cewab nêameyo dayîş.

 

Goreyê xebera Ajansê Mezopotamyayî (MA), tepişteya bi nameyê Ela Kamiş ke zîndanê Baybûrtî de yena tepiştiş, pêvînayîşê 24ê sibate ya bi vistewreyê xo Servet Kamiş dir kerd, binpaykerdişê zîndanî vat. Ela Kamiş dîyar kerd ke binpaykerdişê zîndanî dewam de yê.

 

Ela vat ke selahîyetdaran rê neql kerdê û vat: "Ma texmîn kenê ke tepişteyê edlî, derheqê tepişteyê siyasî yê cinîyan de wayîrê zanayîşî nîyê. Serê pateyê sipî de nengî û heqaretê giranan nusenê û erzenê hetê ma. Ma nê çî îdarekarê zîndanî dir pare kerd û ma gerre kerd labelê ma netîceyêk nêgirewt.”

  

Servet Kamiş zî diyar kerd ke qawîşa Elayî de tena embazêke ci esta û vat: “Yeno pawitiş ke embaza aye demêk nêzdî de bêro veradayîş. Do Ela bi tena sereyê xo bimano. Endîşeyê ma seba cuya aye esta. Veyva mi xeylêk rey waşt ke berê zîndanê ke bîn la no waştişê ci ame redkerdiş. Sey keyeyê ci, ma binpaykerdişê zîndanam serê çapemenî de taqîb kenê û seba cuya aye endîşeyê ma estê.”

 

Tewr peyîn zî Servet Kamiş veng da pawitoxê heqê merdiman, avûkat û siyasetmedaran ke seba taqîbkerdişê binpaykerdişan şêrê Zîndanê Baybûrtî.