Dîlan Babat-Oznur Deger 

 

ANQARA - Cinîyê bajarê cîya tewrê kongreya DBPyî bî bale antî serê tecrîdê Rayberê PKKyî Abdullah Ocalan û dîyar kerdî ke do wareyê 8ê Adare azadîya Rayberê PKKyî Abdullah Ocalan biqîrê.

 

 Partîya Herêmanê Demokratîke (DBP) bi şîarê ‘bi komeleyê azad ver bi cuya azad’ 6in Kongreyê xo 27ê Sibate de Anqara de bikerê. Xeylêk bajaran de welatî tewrê kongreya bî û azadîya Rayberê PKKyî Abdullah Ocalan û tewrbîyayîşê 8ê Adare vejîya vernê.

 

Cinîyê ke tewrê kongre bîbî, derheqê tecrîd û 8ê Adare de qisey kerdî.

 

‘Tecrîd serê heme şaranê ma de yo'

 

Endama Însiyatîfê Dadîyê Aştîye ya Anqarayî Beyzo Oruç bale ant serê tecrîdê Abdullah Ocalanî û vat: “Tecrîd serê heme şarî de yeno kerdiş. Şarê Kurdî esîr ameyo girewtiş. Ma seba aştî û demokrasî tewrê kongre bî. Ganî tepişteyê nêweşî bêrê veradayîş, tecrîd peynî bibo û aştî bêro.” 

Beyzo sewbîna 8ê Adare heme cinîyan rê pîroz kerd û vengdayîşê tewrbîyayîşê 8ê Adare heme cinîyan rê kerd û sewbîna şerê Rusya-Ukranayî zî şermezar kerd.

 

‘Fikrê mîmarê aştîye heme dinya de vila bi'

 

Hemsereka Komeleya Hetkarîya û Paştdayîşê Keyeyê xo Derguşê Şaristanîyan de Vînî kerdê (Mebya-Der) yê Edenî Şukriye Bayav zî wina vat: “Birêz Ocalan 23 serrî yo yeno tecrîdkerdiş.  Tena rayberê Şarê Kurdî ney, rayberê heme şaran o. Heqê heme tepişteyan esto. Heqê heme tepişteyan esto. La 25ê Adara 2021 ra xebere ci ra nîna girewtiş. Ganî lezabez bi mîmarê aştîye dir pêvînayîş bêro kerdiş. Fikrê ci pêro dinya rê vila bîyê. Kurd û Tirkî 100 serrî yo pîya ciwîyenê. Wa êdî cenazeyî çinî bê. Wa dadîyî nêbermê."

 

'Cinîyan bedelê pîlî dayî'

 

Şukrîye zî vengdayîşê tewrbîyayîşê 8ê Adare kerd û vat: "Wa heme cinî û dadîyî 8ê Adare de vejîyê meydanan. Cinîyan 8ê Adare bi bedelê pîlî girewtî. Ganî heme cinî û dadîyî wareyan de bê. Ganî ma 8ê Adare ra heta 21ê Adare veng û waştişanê xo berz bikerê."

 

‘Heta azad nêbo ma zî azad nêbenê'

 

Endama Mebya-Derî Nedret Kalkan tecrîd şermezar kerd û vat: “Heta serekê ma azad nêbo, ma cinî û heme şar zî azad nêbenê. Mifteyê aştîye o yo. Her kes nê zano. Bi serran o xebere ci ra nîna girewtiş. Ganî her kes bibo yew û na zincîre bişikêno. Ganî ma 8ê Adare de wareyan de bê. Ganî ma hêrsê xo bîyarê ziwan. Her roje cenazeyî yenê êdî wa peynîya ci bêro. Ganî seba nê ma meydanan pirr bikerê."