Melîke Aydin

 

ÎZMÎR - Fehîme Poyraz dîyar kerd ke aye û xeylêk cinîyê bînî do 8ê Adare de edalet biwazê û dîyar kerd ke eke seba Kurd û cinîyan edalet bêro, do seba her kesî bêro.

 

Cinî seba Denîz Poyraz ke hêrişê hemverê HDPyî yê Îzmîrî de hetê gumanbar Onur Gencer ra ameye qetilkerdiş, edalet bi ca bêro û hêzê pey gumanbarî vejîyê werte têkoşînê xo dewam kenê. Fehîme Poyraz ke dimayê qirkerdişî şî cayê serebûtî û vat ‘Denîzêke şî do hezar Denîzî bêrê' yew kesa ke têkoşîno tewr pîl da bî. Fehîme ke kênaya ci ameye qetilkerdiş û di tutê ci zî tepişteyê, bi têkoşînê xo xeylêk hetan rê bena îlham. 

 

Fehîme 8ê Adare Roja Cinîyanê Dinya de seba heme cinîyan edalet waşt û vat, dewlete aştîye nêwazena, gumanbarî dewlete û bêcezaverdayîş hêz gênê û wina vat: "Yê ke yenê qetilkerdiş tena Kurdî nîyê. Tirkî zî heme merdimî zî yenê qetilkerdiş. Ma tena heqê Kurdan ney heme şaran pawenê. Seba ke  Kurd û cinîyan rê edalet bêro, do seba pêro şaran bêro."

 

'Çeteyî dewlete îdare kenê'

 

Fehîme dewam de wina vat: "Şar seba qirkerdiş û feqîrî wurza serê lingan. Seba ke dewlete dewlete nêwazena, seba aştîye hemle nêkena. Çeteyê dişminê Kurdan dewlete îdare kenê. Înfazê tepişteyan yeno veşnayîş. Tepişteyê nêweşî nînê veradayîş. cenazeyî zîndanan ra nêvejenê. Di tut û mêrdeyê Emîne Şenyaşar ameyî qetilkerdiş. Lajêke aye tepişte yo. Oyo ke qetil kerd zî nika meclîs de yo. Emîne Şenyaşar nêweşa şekir û tansîyonî ya. Wa heme dayik û heme hetî wayîrê Emîne Şenyaşar vejîyê.”

 

‘Kiştişê cinîyan’

 

Fehîme qiseykerdişê xo de bale ant serê kiştişê cinîyan û vat: "Dayîk, wayê û tutê ma yenê qetilkerdiş. Gumanbarî çend serrî yenê tepiştiş û dima ra yenê veradayîş. No edalet nîyo. Gumanbarê ke yenê veradayîş reyna suc kenê. Ganî cezayê giranî bidê kiştoxê cinîyan."

 

Fehîme dîyar kerd ke kênaya aye Denîze bînaya HDPyî de ameya qetilkerdiş, polîsan mudaxele nêkerdo û vat: "Camêrdo çim sûr tena bi sereyê xo nê nêkerdo. Cesaretê ey hende çin o. Yê ke paşte ey de yê estê. Dadgehe de zaf rehet qisey kerd. Tena seba kênaya xo ney, seba pêro heme cinîyan edalet wazena. Veng dana şarî ke ma bêwayîr nêverdê. Ma tena heqê şarê kurdî ney, ma heqê pêro şaran pawenê. Xora edalet seba   Kurd û cinîyan bêro do seba her kesî bêro."