MÊRDÎN - Cinîyan bale ant serê rewşa sîyasetmedara kurde Aysel Tûglûk û dîyar kerd ke ganî ATK goreyê waştişê îqtîdarî tênêgêreyo û sere de Aysel Tûglûk wa heme tepişteyê nêweşî serbest bêrê veradayîş.

 

Pêwa teşhîsê nêweşîya demansî yê Sîyasetmedare Aysel Tugluk ameya ronayîş zî Sazgehê Tipê Edlî (ATK) yê girêdayê Wezaretê Dade ya reyke bîn derheqê ci de raporê, "Eşkena tepişte bimano" da. Rewşa Aysele şertê zîndanî de roj bi roje giran beno û zîndan de dermankerdişê ci mimkun nîyo. Seba ke bale biancê serê rewşa Aysel Tûglûk çalaki û bername yenê kerdiş. Cinîyê ke serê rewşa Aysel Tûglûk de qisey kerdî vengdayîşê hîsgêrî kerdî.

 

‘Hemverê tepişteyê sîyasîyan de polîtîkayêk taybet yeno kerdiş’ 

 

Aktîvîsta Tevgerê Cinîyan ê Azadan (TJA) Ayhan Ateş destpêkê qiseykerdişê xo de bale ant serê rewşa tepişteyan û vat: “Rewşa tepişteyan her ke şino ver bi xirabîyayîşî şin o. No demêk derg o ke tepişteyî bi teda û binpaykerdişê heqan ê ke zêde benê dir rî bi rî manenê. Tepişteyê nêweşî nînê veradayîş, infazê xeylêk tepişteyan yeno veşnayîş û bi caardişê kêfî nêzdîyê tepişteyan benê. Hemverê tepişteyê sîyasî polîtîkayêk taybet yena kerdiş û bi hawayê bêhuqûqî hemverê tepişteyan têgêrenê.”

 

‘Wa tepişteyê nêweşî bêrê veradayîş’

 

Ayhane dewam de wina vat: “Ma şexsê Aysel Tûglûk de rewşa tepişteyê nêweşan çi sewîye de yê vînenê. Aysele seba ke hem cinî ya, hem zî sîyasetêk demokratik kenê, hemverê nê polîtîkayêk taybet yeno kerdiş. Seba nê raporê aye yê weşîye zî hetê îqtîdarî ra nîno vînayîş. Seba Aysel Tûglûk bêguman çalakî û bernameyê sazgehî, rêxistin û partiyan dewam ê. Aysele hem nasnameyê ci yê cinsî, hem yê sîyasî û hem zî ê kurdbîyayîşî esto û seba nê nîna veradayîş.”

 

‘Ganî her kes hîsgêr nêzdî bibo’

 

Îdarekara Egîtîm Senî ya Şubeyê Mêrdînî Tuba Çetîk zî wina vat: “Pawitişê asayîş û weşîya merdiman heqêko bingehîn o. La no heq zîndanan de yeno binpaykerdiş. Tena hemverê Aysel Tûglûk ney, şexsê ci de hemverê heme tepişteyê sîyasî nêzdîbîyayîşêk bêhuqûqî esto. Ganî ATK goreyê waştişê îqtîdarî tênêgêreno. Hemverê nê caardişan lazim o ke bêvengiya hemverê tepişteyê nêweşan heme wareyê komelî bêrê peynîkerdiş. Ez veng dana tu kes hemverê na babete de bêveng nêmano û hîsgêr nêzdî bibo. Wa tepişteyê nêweşî ganî serbest bêrê veradayîş.”